Rritet numri i rasteve pozitive me COVID-19 në Suharekë, 60 raste brenda një jave
Rastet e të infektuarve me COVID-19 në Kosovë ditëve të fundit kanë shënuar ngritje, duke e krahasuar me ditët e para të këtij viti. Edhe në Komunën e Suharekës rastet pozitive me COVID-19 në ditët e fundit janë shtuar e që si pasojë Suhareka e cila për disa javë bënte pjesë në zonën e gjelbër, […]
Rastet e të infektuarve me COVID-19 në Kosovë ditëve të fundit kanë shënuar ngritje, duke e krahasuar me ditët e para të këtij viti.
Edhe në Komunën e Suharekës rastet pozitive me COVID-19 në ditët e fundit janë shtuar e që si pasojë Suhareka e cila për disa javë bënte pjesë në zonën e gjelbër, u kthye përsëri në zonën e verdhë, shkruan SuharekaOnline.
Sa raste pozitive me COVID-19 u identifikuan brenda një jave në Komunën e Suharekës?
Në bazë të raportimeve ditore të Institutit Kombëtar të Shëndetësisë Publike në Kosovë bëhet e ditur se që nga data 11 deri më 17 janar në Komunën Suharekës janë identifikuar 60 raste të reja me COVID-19 dhe janë regjistruar 4 raste të vdekjës.
Më 15 janar në Komunën e Suharekës u identifikuan 15 raste pozitive me COVID-19, numër ky rekord brenda një jave, ndërsa më 17 janar u identifikuan vetëm dy raste pozitive numër ky më i vogël krahasuar me ditët tjera të javës.
Gjithashtu, më datë 14 janar në Suharekë u regjistruan 2 viktima nga COVID-19, numër ky rekord i vdekjeve brenda një jave.
Të premtën (15 janar), ministri në detyrë, Armend Zemaj ka njoftuar për lehtësimin e masave anti-COVID dhe kategorizimin e ri të komunave në bazë të rrezikshmërisë së përhapjës së infeksionit me COVID-19, ku edhe është bërë e ditur se Komuna e Suharekës është kthyer nga zona e gjelbër në atë të verdhë.
Më poshtë statistikat mund t’i shihni përmes një tabele.
Data | Rastet pozitive | Viktima |
11 janar, 2021 | 4 | 0 |
12 janar, 2021 | 14 | 1 (75 vjeç) |
13 janar, 2021 | 9 | 0 |
14 janar, 2021 | 6 | 2 (89,64 vjeç) |
15 janar, 2021 | 15 | 0 |
16 janar, 2021 | 10 | 1 (71 vjeç) |
17 janar, 2021 | 2 | 0 |
Gjithsej | 60 | 4 |
Nga cilat vende janë rastet pozitive me COVID-19 që u identifikuan brenda kësaj jave?
Në bazë të raportimeve ditore të IKSHPK-së gjatë kësaj jave vendet ku rastet pozitive me COVID-19 ishin më të theksuara janë: Bukosh, Mushtisht, Gjinoc, Samadrexhë, Sopijë, Studençan, Peqan etj.
Cilat janë masat kufizuese për Komunën e Suharekës?
Komuna Suharekës e cila tashmë është pjesë e zonës së verdhë, zonë kjo e cila konsiderohet me rrezikshmëri të mesme të përhapjës së infeksionit me COVID-19 ka këto masa kufizuese:
-Operatoret ekonomik lejohen të punojnë nga 05:00-22:00;
-Qendrat tregtare lejohen të punojnë nga 05:00-22:00;
– Shërbimet e hotelerisë dhe gastronomisë lejohen të punojnë nga ora 05:00 deri në ora 22:00, ndërkaq pas orës 22:00 punojnë me shërbim “merr me vete” dhe “porosi me dërgesë”;
-Të gjitha institucionet publike dhe private këshillohet të reduktojnë stafin bazuar në specifikat e tyre dhe “Manualin për mbrojtjen nga përhapja e Covid-19”;
-Transporti publik lejohet të punojë duke shfrytëzuar deri në 50% të kapaciteteve, duke respektuar “Manualin për mbrojtjen nga përhapja e Covid-19”;
-Taksitë lejohen të punojnë me një (1) pasagjer prapa ose tre (3) nëse janë anëtarë të familjes, duke respektuar “Manualin për mbrojtjen nga përhapja e Covid-19”;
– Institucioneve vartëse të MKRS dhe komunave (siç janë teatrot, bibliotekat, filarmonia, galeritë, ansamblet, baleti, kinematë, qendrat rinore, muzetë, qendrat e kulturës me grupe dhe të ngjashme), lejohet të punojnë vetëm deri në orën 22:00 duke shfrytëzuar deri në 40% të hapësirës/sipërfaqeve të objekteve përkatëse për të gjitha aktivitet (si në shfaqje ashtu edhe në ushtrime), duke respektuar “Manualin për mbrojtjen nga përhapja e Covid-19”,
-Lejohen aktivitetet sportive në hapësira të mbyllura dhe të hapura, ku gjatë stërvitjeve në hapësirat e mbyllura mund të marrin pjesë deri në 20 persona, ndërsa gjatë garave deri ne 50 persona, gjithmonë bazuar në protokolle vendore dhe ndërkombëtare sportive, si dhe duke u bazuar në “Manualin për mbrojtjen nga përhapja e Covid-19”,
-Lejohen fitneset dhe pishinat e mbyllura për aktivitete individuale rekreative duke shfrytëzuar deri në 40% të hapësirave/sipërfaqeve, duke respektuar “Manualin për mbrojtjen nga përhapja e Covid-19”.
-Pavarësisht pikave 36.7, 36.8 dhe 36.9 më lartë, autorizohet Ministria e Shëndetësisë që bazuar në rekomandimet e IKSHP-së të nxjerrë vendime operacionale të ndalojë këto aktivitete.