Ngritet aktakuza për ‘grabitjen’ në Gjinoc

Ishte data 19 maj 2018, rreth orës 22:25 min., të pandehurit B.B, S.M dhe Z.B  me veturë shkojnë te shtëpia e të dëmtuarit S.M., në fshatin Gjinoc- Suharekë, vendosin maskat në fytyrë dhe duke përdorur armë të shkurta dhe të gjata futen në korridorin e shtëpisë së të dëmtuarit.

Në momentin e ballafaqimit me të dëmtuarin, të njëjtin e kërcënojnë duke ia drejtuar armët, dhe gjatë përleshjes dhe rezistencës së të dëmtuarit shkrepin me armë dhe më pas largohen nga vendi i ngjarjes.

Ndërkaq sot Gjykata Themelore në Prizren ka ngritur aktakuzën. Sipas aktakuzës, i pandehuri B.B., si anëtarë i grupit të armatosur, me kanosje serioze për të sulmuar jetën apo trupin e personit tjetër, së bashku me të pandehurit S.M dhe Z.B., tentojnë të përvetësojnë pasurinë e luajtshme të personit tjetër.

Sipas aktakuzës, i pandehuri B.B., akuzohet edhe për veprën penale “Mbajtje në pronësi, kontroll ose posedim të paautorizuar të armëve”.