Mbi 20 pjesëtarë të FSK-së nga Suhareka marrin pension të skemës së Forcave të Sigurisë së Kosovës

Agjencia e Statistikave të Kosovës (ASK) ka publikuar “Statistikat e Mirëqenies Sociale” për tre muajt e parë të vitit 2021.

Ky publikim ofron të dhëna për numrin e përfituesve nga skema e pensioneve të Forcës së Sigurisë së Kosovës.

Pension i Forcave të Sigurisë së Kosovës- është pagesa e rregullt mujore që i paguhet pjesëtarit të FSK-së i cili i plotëson kriteret e parapara në Ligjin për pensionet e pjesëtarëve të Forcës së Sigurisë së Kosovës (Ligji nr.04/L-084).

Përfituesit kanë të drejtë në pensionin e FSK-së, pavarësisht nga një punësim tjetër në sektorin publik ose privat, përveç nëse ata shërbejnë sërish në FSK.

Po ashtu përfitues nga ky pension pas vdekjes së pensionistit edhe bashkëshorti-ja, fëmijët trashëgimtarë, duke përfshirë fëmijët martesor, jashtëmartesor dhe të adoptuar dhe prindërve të pensionistit nëse pensionisti nuk ka bashkëshort-e dhe fëmijë.

Shuma e pagesës së pensioneve të FSK-së përcaktohet prej 60%, 70% dhe 80% të pagës mesatare.

Në bazë të të dhënave të ASK-së bëhet e ditur se përfitues nga kjo skemë në Komunën e Suharekës janë gjithsej 24 pjesëtarë.

Sipas këtyre statistikave në Komunën e Suharekës nuk vërehet ndonjë rritje apo rënie e numrit të përfituesve nga skema e pensioneve të Forcës së Sigurisë së Kosovës.

Bazuar në gjendjen e muajit mars 2021, numri i përfituesve nga skema e pensioneve të Forcave të Sigurisë së Kosovës (FSK) ishte 590. Numri më i madh i përfituesve ishte në komunën e Prishtinës me gjithsej 53 ose 9 % e numrit të përgjithshëm.