I vetmi shqiptar që Hashim Thaçi e merr seriozisht është Albin Kurti

Presidenti Hashim Thaçi është plotësisht i vetmuar, e vetmia të çon në ferr, shkaku se të shtyen ta bësh ujkun-dajë, aq e rëndë që është vetmia.

Ndërsa po e shohim se Kosova është braktisur nga Evropa (pa marrë parasysh çfarë standardesh plotëson Kosova, për BE-në Kosova mbetet inferiore dhe e padukshme).

Ka ardhur puna deri këtu sa as ambasadori i Britanisë në Kosovë nuk merret më me Kosovën, ndërsa statuset e ambasadorit të Amerikës përditë e më shumë po bëhen më të palexueshme.

Shqipëria bën tregti me kufirin me Kosovën, për të krijuar distancë me Kosovën;
Serbia kërcënon me luftë, hyn e del nga Kosova si fantazma nëpër terr;
Mogerini nuk e fsheh lezetin kur ndodhet pranë Vuçiçit ndërsa nuk arrin ta fsheh neverinë e madhe dhe antipatinë kur ndodhet pranë Thaçit;
na paragjykojnë si myslimanë dhe tani kemi mbetur të izoluar nga të gjitha anët.

Në momentet e vetmisë së madhe (vetmia është ndjenja më e rëndë, është mallkim) vetmitari, thoshte Zaratustra, ia shtrin dorën njeriut të parë që takon në rrugë.

Prandaj askush nuk është më i rrezikuar sesa vetmitari.
Kështu, i ndodhur para problemeve të mëdha, i izoluar nga të huajt dhe nga të vetët, Presidenti Hashim Thaçi si shpëtimtar në këso rastesh e sheh Rexhep Erdoganin, dhe nuk ka faj që e sheh si të tillë.

Sepse, kur askush nuk të do, ti i gjuhesh atij që të do, se i vetëm askush nuk mbijeton dot. Në këto raste, ti nuk e zgjedh Erdoganin, por e mbledh si njeriun e vetëm që të ka mbetur.

Presidenti Erdogan nuk ja ka çel
telefonin Presidentit Thaçi për shumë arsye:
– nuk qe i zoti ta ndryshojë historinë e Kosovës (ta fshijë pushtuesin osman nga historia jonë, qysh kërkonte Erdogani), sepse ndërhyri Angela Merkel e i tha ‘stop’;
– nuk qe i zoti t’i mbyll shkollat e Gylenit, kur ia lypi Erdogani.
– Dhe disa kërkesa tjera…më të vogla.

Në momentin që Presidenti Thaçi i dëboi profesorët ‘gylenistë’ (por shkollat nuk ua mbylli), Erdogani ia çeli telefonin Thaçit dhe hatri i tij e thirri në telefon Vuçiçin dhe i tha ‘mos’!

Mbështetja e Presidentit Erdogan për Presidentin Thaçi është jetike. Nuk e ka zgjedhur Thaçi-Erdoganin, por i ka mbetur i vetmi që e merr seriozisht.

Sa i përket akuzave të Presidentit Thaçi për Albin Kurtin dhe lidhjet e tij me Iranin, ato akuza qesharake tregojnë se i vetmi shqiptar që Hashim Thaçi e merr seriozisht është Albin Kurti.

P.S. Por peticionin për shkarkimin e tij nuk do ta nënshkruaj, shkaku se e kam si njëfarë ‘Daje'(Turiqevc-Brojë), më keshin familja ☺.