Festë në kohë pandemie në një lokal në Suharekë, policia dënon pronarin dhe 24 perosna të tjerë

Festë në kohë pandemie në një lokal në Suharekë, policia dënon pronarin dhe 24 perosna të tjerë
Eurolinda Zenelaj

20.03.2021 / Suhareka

Edhe pse numri i rasteve pozitive me COVID-19 nga dita në ditë po rritet, e situata nëpër spitalet e Kosovës po rëndohet, edhe përkundër thirrjeve nga institucionet përkatëse për respektim të masave mbrojtëse nga COVID-19, shumë qytetarë e biznese nuk po i respektojnë ato.

Gjatë ditës së premte në një kafiteri në Suharekë, ishin grumbulluar numër i madh i personave, ku sipas burimeve të SuharekaOnline ata kishin filluar që të argëtoheshin nën tingujt e muzikës me zë të lartë, gjë e cila i kishte shqetësuar edhe qytetarët për rreth, të cilët edhe kanë njoftuar policinë.

Lajmin për SuharekaOnline e ka konfirmuar edhe komandanti i Policisë në Suharekë, kapiteni Afrim Sylaj ku ka bërë të ditur se gjatë ditës së premte në një kafiteri në rrugën ”Brigada 123” në Suharekë, policia e Suharekës ka dënuar 25 persona, duke e përfshirë edhe pronarin e lokalit, i cili kishte lejuar grumbullimin e shumë personave, duke shkelur masat anti-COVID.

Sylaj tutje ka thënë se për këtë rast policia do të njoftoj edhe Inspektorët Komunal, gjithashtu ai përsëri ka bërë thirrje për të gjithë qytetarët e Komunës së Suharekës që të respektojnë masat mbrojtëse, në mënyrë që të ruhet shëndeti i të gjithëve.

Rikujtojmë se gjatë kësaj jave në Komunën e Suharekës janë identifikuar 56 raste pozitive me COVID-19 dhe është regjistruar një viktimë e moshë 78 vjeç.

RAPORTO