Dyshimet për ryshfet në subvencionet bujqësore, në 2019 Salih Zyba kishte ngritur kallëzim penal ndaj 3 ish-ministrave

Gjatë ditës së mërkurë, Departamenti i Krimeve të Rënda të Policisë së Kosovës ka zhvilluar një aksion në Agjencinë për Zhvillimin e Bujqësisë, të cilat kanë vazhduar edhe në disa komuna të tjera si: Istog, Gjilan dhe Podujevë.

Lidhur me këto aksione në një konferencë për media ka folur edhe Kryeprokurori i shtetit, Aleksandër Lumezi, i cili ka bërë të ditur sot se pas bastisjes së disa lokacioneve kanë arrestuar 12 persona dhe kanë sekuestruar 400  mijë euro.

Shqetësimin se kishte keqpërdorime në dhënien e subvencioneve dhe granteve e kishte ngritur edhe anëtari i komisionit parlamentar për këtë fushë dhe deputeti i Lëvizjes Vetëvendosje, Salih Zyba.

Dhe jo vetëm kaq, në gusht të vitit 2019, asokohe deputeti i Kuvendit të Kosovës nga radhët e VV-së, Salih Zyba, dorëzoi kallëzim penal për ish ministrat e Bujqësisë, Nenad Rikallo, Memli Krasniqi, Blerand Stavileci, sekretarin e Ministrisë së Bujqësisë, Halim Kapllani, drejtorin e Agjencisë së Zhvillimit të Bujqësisë, Ekrem Gjokaj dhe ish drejtorin e kësaj agjencie, Elhami Hajdari.

VV kishte kërkuar nga prokuroria që të mos vonohet me këto hetime, “tashmë ka fakte të bollshme prej fermerëve, prej këtij kallzimi e veçanërisht prej Raportin e performancës së Auditorit lidhur me procesin e menaxhimit të granteve dhe subvencioneve në sektorin e bujqësisë”, kishte thënë Zyba.

Tutje, ai kishte sqaruar se ky kallëzim penal mbulon dy çështje, grantet në shumën 4 milionë euro të dhëna për 4 konzurciome dhe një kompani secila prej tyre e lidhur drejtpërdrejtë me drejtues politkë dhe ish ministra si dhe keqpërdorimet prej vitit 2014 në këtë fushë.

Jemi të vetëdijshëm që tashmë dhjetra fermerë për vite të tëra kanë kallzuar në prokurori, në polici për keqpërdorimet e mëdha qoftë me grantet e qoftë me subvencionet. Qindra ankesa e padrejtësi kemi pranuar prej tyre në këtë drejtim.