COVID-19 në Suharekë, gjatë muajit prill u regjistruan 153 raste pozitive dhe 9 viktima

Kosova po vazhdon të përballet me pandeminë COVID-19, ku edhe gjatë muajit prill është konfirmuar numër mjaft i madh i rasteve pozitive me këtë virus.

Data 01 prill shënoi ditën ku në Kosovë u regjistrua numër më i madh i rasteve pozitive me COVID-19, poashtu edhe në Komunën e Suharekës ku po në këtë ditë u konfirmuan 12 raste pozitive dhe u regjistruar një viktimë e moshës 70 vjeç.

Nga raportimet ditore të Institutit Kombëtar të Shëndetësisë Publike në Kosovë që përcjellë SuharekaOnline bëhet e ditur se brenda një muaji në Komunën e Suharekës janë konfirmuar 153 raste pozitive me COVID-19 dhe janë regjistruar 9 viktima të moshave të ndryshme, më i riu 53 vjeçar.

Situata e rënduar me pandeminë COVID-19, detyroi Qeverinë e Kosovës që të ndërmerr masa të reja për të parandaluar përhapjen e këtij virusi, të cilat vlejnë për të gjithë territorin e Kosovës, ku ndër to ishte edhe mbyllja totale e gastronomisë, duke lejuar vetëm shërbimin merre me vete dhe ndalimi i qarkullimit të qytetarëve pas orës 22:00, pa i përfshirë rastet urgjente.

Ndërsa, Më 18 prill, sektori i gastronomisë, qendrat tregtare iu rikthyen punës, ndërsa ora policore vazhdon të jetë edhe tani, ku pas orës 22:30 ndalohet lëvizja e qytetarëve, përveç rasteve urgjente.

Në muajin që lamë pas shteti i Kosovës pranoi vetëm 24 mijë doza të vaksinës anti-COVID, me të cilën u vaksinuan personeli shëndetësor dhe një pjesë e grupmoshave 75- mbi 85, dhe të moshuarit me sëmundje kronike.

Komuna e Suharekës me dozat e vaksinës anti-COVID që kishte pranuar, kishte arritur që të vaksinonte mbi 500 qytetarë të saj që i takojnë kategorive të lart-cekura.

Në tabelën e mëposhtme SuharekaOnline ju sjellë në mënyrë të detajuar statistikat e COVID-19 përgjat muajit që lamë pas.