100 mësimdhënës nga Suhareka pritet të testohen për COVID-19

Drejtori i Qendrës Rajonale të Shëndetësisë Publike në Prizren, Prof. Dr Fadil Kryeziu, njofton se trendi i rasteve të të infektuarve po shënon rënie.

Ai për TvPrizrenin ka thënë se është duke vazhduar testimi i mësimdhënësve para se të fillojë procesi mësimor javën e ardhshme.

Në bazë të rekomandimeve të IKSHPK, Kryeziu thotë se deri më tani janë testuar 120 mësimdhënës nga Komuna e Prizrenit, Dragashit, Mamushës, ku disa prej tyre kanë rezultuar pozitiv edhe pse nuk kanë manifestuar simptoma.

Ndërsa në Komunën e Suharekës ende nuk është testuar asnjë mësimdhënës, pasi që sipas Dr. Fadil Kryeziut Komuna e Suharekës nuk ka dërguar ende asnjë listë të mësimdhënësve që do të mund ti testojnë.

Por këtë e ka mohuar drejtori i DKA-së në Komunën e Suharekës, Remzi Bajselmani.

Për SuharekaOnline drejtori Bajselmani ka thënë se të hënën ata kanë dërguar listën me emrat e 100 mësimdhënësve nga Komuna e Suharekës që pritet ti nënshtrohen testimit për COVID-19.

Sipas tij lista është dorëzuar në Ministrinë e Arsimit dhe në Institutin Kombëtar të Shëndetit Publik të Kosovës dhe se janë në pritje për testimin e tyre.

© SuharekaOnline. Të gjitha të drejtat janë të rezervuara.