Thierry Henry kërkon falje pas reagimeve nga tifozët nigerianë për komentin gjatë Botërorit
Legjenda e futbollit francez, Thierry Henry, ka kërkuar falje publikisht pas komenteve të bëra gjatë transmetimit të ndeshjes hapëse të Kupës së Botës 2026 mes Shteteve të Bashkuara të Amerikës dhe Paraguait, të cilat shkaktuan reagime të shumta nga tifozët nigerianë.
Foto: Ilustrim
Ish-sulmuesi i Arsenalit dhe Francës, i cili ishte pjesë e panelit të Fox Sports së bashku me Zlatan Ibrahimovic dhe Alexi Lalas, komentoi veshjen e yllit të internetit IShowSpeed, i cili kishte kombinuar fanellën e SHBA-së me pantallonat e Kombëtares së Nigerisë.
Henry tha se përzierja e pjesëve të ndryshme të uniformave konsiderohet shpesh si “fat i keq” në sport, duke shtuar se “sot je për SHBA-në”. Komenti u shpërnda gjerësisht në rrjetet sociale dhe u interpretua nga shumë tifozë nigerianë si ofendues.
Pas reagimeve, francezi sqaroi se deklarata e tij ishte bërë në formë shakaje dhe nuk kishte për qëllim të nënçmonte Nigerinë.
“Po flisja për fatin e keq që sjell thyerja e kompletit të uniformës, jo për Nigerinë. Nëse do të kishte veshur pantallona të Francës, Italisë apo Spanjës, do të kisha thënë të njëjtën gjë. Kam respekt të madh për Nigerinë dhe popullin e saj”, deklaroi Henry.
Ai theksoi se e vlerëson kulturën futbollistike të Nigerisë dhe kujtoi lidhjen e tij me vendin, duke përmendur edhe periudhën kur luajti te Arsenali së bashku me legjendën nigeriane Nwankwo Kanu.
