Ndërtimi i stadiumeve moderne në Kosovë, mediat kroate shkruajnë: Si Kosova mundet por jo Kroacia!

Pse Kosova mundet por jo Kroacia? Kjo është një pyetje që duhet t’i bëhet qeverisë, si kësaj aktuale ashtu edhe asaj të mëparshme.

Kështu fillon shkrimin një ndër mediumet prestigjioze kroate 24sata.hr duke ngritur lart angazhimet e Ministrisë së Sportit të Kosovës për investime, njëkohësisht duke kritikuar qeveritë kroate.

Duke marrë parasysh sukseset e arritura nga kombëtarja kroate në 30 vitet e fundit, stadiumi kombëtar duhet të ishte bërë realitet prej kohësh. Edhe pse u dhanë premtime të shumta, situata nuk lëvizi nga ngërçi. Dinamo dhe Hajduk janë ende në pritje të zgjidhjes së Maksimirit dhe Poljudit. Ka shumë premtime, në mënyrë simptomatike, sidomos para zgjedhjeve lokale.

Ministria e Kulturës, Sportit dhe Rinisë  së Kosovës ka njoftuar se do të ndërtojë dy stadiume të reja në vitet e ardhshme. Ministri Hajrullah Çeku ka njoftuar opinionin se projektet tashmë janë miratuar dhe së shpejti do të fillojnë punimet. Krahas ndërtimit të dy stadiumeve të reja, Qeveria planifikon të rinovojë edhe dy stadiumet ekzistuese. Investimi total në këtë projekt i kalon 50 milionë euro.

Katër investime të reja të mëdha në stadiumet e futbollit. Peja dhe Ferizaj do të marrin stadiume të reja, ndërsa stadiumet në Prizren dhe Vushtrri do të rinovohen tërësisht”, tha ministri.

Projektet për stadiumet kanë përfunduar. 19 milionë euro për Pejën dhe Ferizajn, 13 milionë euro për Prizrenin dhe 5 milionë euro për Vushtrrinë. Nga kjo shumë, komuniteti lokal do të financojë 20 për qind të rinovimit në Vushtrri. Jemi plotësisht të përkushtuar për zbatimin e planit pesëvjeçar për përmirësimin e infrastrukturës së futbollit në vend.

Ndërtimi i fushave të reja do të sjellë lehtësim të konsiderueshëm për klubet e Kosovës dhe kombëtaren, të cilat shpesh janë përballur me kushte të këqija të lojës. Për probleme të tilla janë ankuar edhe klubet dhe kombëtaret që kanë ardhur në Kosovë. Ata që kujtojnë kualifikimet për Botërorin 2018, do të kujtojnë se klubet luajtën në të njëjtin grup me Kosovën, por ndeshjen e kthimit nuk e luajtën atje, por në Shqipëri, në stadiumin “Loro Boriçi” të Shkodrës.

Stadiumi Fadil Vokrri në Prishtinë do të vazhdojë të jetë shtëpia e kombëtares së Kosovës, por ndërtimi i stadiumeve të reja hap mundësinë e zhvillimit të ndeshjeve edhe në qytete të tjera.