FFK ndihmon klubet e Ligës së Dytë dhe Ligës së Tretë

Federata e Futbollit të Kosovës në vazhdimësi po punon për të mirën e futbollit kosovar, duke u munduar që në çdo formë t’i përkrahë klubet dhe t’i ndihmojë maksimalisht ato.

Pas arritjes së marrëveshjes për të drejtat televizive për Superligë dhe Ligën e Parë si dhe finalizimin e marrëveshjes së sponzorizimit të Ligës së Parë, nga të hyrat e të cilave përfitojnë klubet e këtyre ligave, tani FFK do t’iu dalë në ndihmë edhe ekipeve në ligat tjera.

Këtë vit FFK do t’i mbulojë të gjitha shpenzimet e gjyqtarëve dhe zyrtarëve të ndeshjeve, duke i liruar nga pagesa të gjitha klubet e Ligës së dytë dhe të tretë, duke krijuar një fond të veçantë.

Ju kujtojmë se në Ligën e dytë janë 16 klube, derisa në të tretën mbi 30 sosh.

“Federata e Futbollit të Kosovës do t’i ndihmojë klubet jo vetëm në periudha të veshtira sikurse kjo e pandemisë, por do të vazhdojë t’u qëndrojë afër gjithmonë”, thuhet në njoftimin e FFK-së.