E papritur për Juventusin: Dështon transferimi i Edon Zhegrovës
Juventusit i është dhënë një goditje e papritur në tregun e transferimeve, pasi shpresat për të sjellë në Torino yllin kosovar, Edon Zhegrova, duket se kanë marrë fund.
Presidenti i Lille, Olivier Letang, ka qenë i prerë në deklaratën e tij, duke i dhënë fund zërave që e lidhnin Zhegrovën me një kalim te “Zonja e Vjetër” këtë verë.
Në një prononcim për mediat para ndeshjes së Lille kundër Monacos, Letang shpjegoi situatën e qartë. “Edon Zhegrova do të qëndrojë me ne këtë sezon. Nuk kam marrë asnjë ofertë,” tha ai. Ai hodhi poshtë me forcë pretendimet e mediave italiane. “Mediat italiane kanë tendencë të ekzagjerojnë. Nuk ka asnjë marrëveshje apo negociata në zhvillim e sipër.”
Letang, megjithatë, pranoi se kishte pasur disa biseda me drejtuesit e Juventusit në të kaluarën. “E njoh shumë mirë Damien Comollin dhe kemi folur disa herë që kur ai mori drejtimin e Juventusit,” shpjegoi ai. “Pati disa shkëmbime disa javë më parë dhe dera ishte ndoshta më e hapur atëherë, por sot qëndrimi im është i qartë. Edoni qëndron.”
Kjo deklaratë e vendosur nga presidenti i Lille i jep një pikë pothuajse përfundimtare këtij transferimi. Ajo e detyron Juventusin të shikojë alternativa të tjera për të përforcuar sulmin e tyre, pasi ylli kosovar nuk do të jetë më një opsion për këtë merkato. Interesimi i madh i “bardhezinjve” për Zhegrovën tani duket se do të mbetet vetëm një histori e kësaj vere.
