Rahovec, sekuestrohen armë dhe municion pas një rasti kanosjeje
Policia e Kosovës ka ndërmarrë një aksion të suksesshëm në komunën e Rahovecit, ku janë sekuestruar disa armë dhe municione pas një rasti kanosjeje.
Foto: Ilustrim
Sipas raportit zyrtar, Stacioni Policor në Rahovec ka pranuar një raportim nga një viktimë, mashkull i moshës madhore, i cili ka deklaruar se është kanosur nga një person tjetër pas një mosmarrëveshjeje. Duke vepruar në bazë të ankesës, hetuesit policorë kanë nisur menjëherë hetimet, pasi dyshohej se i dyshuari posedonte armë në pronën e tij në fshatin Pataqan i Poshtëm.
Në bashkëpunim dhe konsultim me prokurorin kujdestar, është kryer kontroll në shtëpinë dhe objektet përcjellëse të të dyshuarit. Si rezultat i kontrollit, janë sekuestruar:
• Një pushkë gjuetie dhe 25 fishekë,
• Një pistoletë dhe 25 fishekë,
• Një pushkë ajrore dhe
• Një pistoletë për sinjalizim me zë.
Në bazë të provave të mbledhura, me vendim të prokurorit kujdestar, ndaj të dyshuarit janë ngritur akuza për veprat penale:
• “Kanosje”, dhe
• “Mbajtja në pronësi, kontroll ose posedim të paautorizuar të armëve.”
I dyshuari është ndaluar për 48 orë, ndërsa hetimet për rastin vazhdojnë.
