Goditet tentativa për kontrabandë nga Shqipëria në Kosovë, arrestohet një shtetas kosovar

Gjatë kontrolleve të intensifikuara bazuar në analizën e riskut, shërbimet e Policisë Kufitare ndaluan një kamionçinë të drejtuar nga shtetasi B. Gj., 46 vjeç, banues në Kosovë.

Gjatë kontrollit të automjetit, u gjetën mallra ushqimore pa dokumentacion të rregullt, të cilat i dyshuari po përpiqej t’i nxirrte nga Shqipëria jashtë procedurave doganore, përmes një rruge të paligjshme kufitare.

Në përfundim të hetimeve, Seksioni për Hetimin e Krimeve në DVKM Kukës arrestoi në flagrancë drejtuesin e kamionçinës, për veprën penale “Kontrabanda me mallra të tjera”.

Mallrat dhe automjeti janë sekuestruar si prova materiale, ndërsa materialet procedurale i janë dorëzuar Prokurorisë pranë Gjykatës së Shkallës së Parë, Juridiksioni i Përgjithshëm Kukës, për veprime të mëtejshme.

Policia Kufitare njofton se kontrollet dhe masat e rrepta për të parandaluar dhe goditur paligjshmëritë në pikat kufitare do të vijojnë me intensitet të lartë.