Dhuna në familje vijon të godasë, katër raste brenda vetëm një dite, viktimë gratë
Brenda vetëm 24 orëve të fundit në qytete të ndryshme të Kosovës janë raportuar katër raste të dhunës në familje.
Foto: Ilustrim
Në Prishtinë, në orën 06:06, një grua kosovare u sulmua fizikisht nga vajza dhe bashkëshorti i saj pas një mosmarrëveshjeje. Ndërsa bashkëshorti i dyshuar u arrestua dhe më pas u lirua në procedurë të rregullt, viktima dhe vajza e saj u dërguan në strehimore, duke lënë të hapur pyetjen mbi sigurinë afatgjatë të saj.
Një tjetër rast u regjistrua në Shtime në orën 11:30 të po të njëjtës ditë, ku një burrë kosovar u arrestua pasi sulmoi fizikisht nënën e tij. Ky i dyshuar, ndryshe nga rasti i Prishtinës, është dërguar në mbajtje me vendim të prokurorit.
Në Istog, në orën 23:55, një grua raportoi se bashkëshorti i saj ushtronte vazhdimisht dhunë fizike dhe psikike ndaj saj. Përsëri, i dyshuari u shoqërua në stacionin policor dhe u lirua në procedurë të rregullt pas intervistimit, një praktikë që shpesh kritikohet nga aktivistët për të drejtat e njeriut.
Dita e 23 korrikut solli dy raste të tjera të dhunës në familje. Në Mitrovicë, në orën 12:00, një grua raportoi se ishte sulmuar fizikisht nga kunata e saj pas një mosmarrëveshjeje. Edhe në këtë rast, e dyshuara u shoqërua dhe rasti shkoi në procedurë të rregullt. Më vonë, në Vushtrri, në orën 19:50, një grua tjetër u sulmua fizikisht nga bashkëshorti i saj, një shtetas i Shqipërisë, i cili më pas u largua në drejtim të panjohur. Nuk u raportuan lëndime fizike, por rasti mbetet nën hetime.
