FSK një institucion model për vendin dhe për rajonin

27.11.2018 OP-ED

Themelimi dhe trajnimi i FSK-së është pikërisht një prej avantazheve më të mëdha të sigurisë kombëtare të Kosovës. Një institucion i nisur nga fillimi. Me standardet më të larta demokratike të NATO-s.

Kredibile, përfaqësuese dhe e gatshme.
Kjo është Forca e Sigurisë së Kosovës (FSK). Një institucion model për vendin dhe për rajonin. Institucioni më i besueshëm për vite e vite me radhë nga qytetarët e Kosovës. Me rritje të dukshme, anipse jo deri në masën sa synojmë, të besueshmërisë edhe të komunitetit serb në Kosovë.
FSK sot feston Ditën e Forcës! Është 27 Nëntori, kur qytetarët mund të vizitojnë FSK-në me dyer të hapura. Është dita kur nxënësit e vendit tonë mund të marrin motiv për t’i shërbyer atdheut.
Shërbimi ndaj atdheut është thelbi i pjesëtarëve të FSK-së. Të përgatitur mirë, të edukuar, kredibilë dhe të gatshëm për të kryer detyrën e vet Kushtetuese dhe ligjore.
Ata dhe ato janë nga të gjitha komunitetet. Përfaqësojnë të gjithë qytetarët e Kosovës. Nuk kanë dhe asnjëherë nuk do të kenë dallim.
Siguria në Kosovë është përmirësuar në vazhdimësi. Institucionet e sigurisë, në përgjithësi, dhe FSK, në veçanti, kanë bërë hapa të mëdhenj në modernizimin e tyre.
Sot, FSK është institucion i krahasueshëm me shtetet anëtare të NATO-s. Zaten, FSK është produkt i NATO-s. Është fëmijë i NATO-s.
Shtetet që kalojnë nga një sistem në sistem tjetër, zakonisht një prej vështirësive më të mëdha që hasin është transformimi i institucioneve të sigurisë. Kështu ka ndodhur dhe po ndodh me secilin shtet tjetër në rajonin tonë.
Themelimi dhe trajnimi i FSK-së është pikërisht një prej avantazheve më të mëdha të sigurisë kombëtare të Kosovës. Një institucion i nisur nga fillimi. Me standardet më të larta demokratike të NATO-s.
Që nga viti 2009, kur FSK kishte marrë formën e saj, përgatitjet e vazhdueshme kanë dëshmuar për gatishmëri të avancuar për mision të ri.
Tashmë, kur jemi më së afërmi për të ndryshuar misionin e FSK-së, Kosova merr përgjegjësinë për të kontribuar në sigurinë rajonale dhe sigurinë globale.
Një tregim i shkurtër dhe motivues do të ishte: Një popul i vogël që literalisht është shpëtuar falë ndërhyrjes së shteteve demokratike, 20 vjet më pas është i gatshëm të ndihmojë (bashkë me shtetet demokratike) popujt tjerë në vështirësi.
Dhe, pjesëtarët e FSK-së janë të gatshëm që krah-për-krah me ushtritë e vendeve të NATO-s të ndihmojnë paqen, sigurinë dhe stabilitetin anëkënd botës.
Ky është tregimi i Kosovës.
Kjo është Forca Jonë Moderne.