VV-LDK sot në takim me ambasadorët e QUINT-it

Janë bërë më shumë se 3 muaj që nga mbajtja e zgjedhjeve të parakohshme për Kuvendin e Republikës së Kosovës, ku fituese doli Lëvizja Vetëvendosje duke lënë pas Lidhjen Demokratike të Kosovës dhe Partinë Demokratike të Kosovës.

Menjëherë pas përfundimit të zgjedhjeve kishin filluar takimet e grupeve punuese të VV-së dhe LDK-së për përafrimin e programit qeverisës, ku këto takime rezultuan me sukses.

Ndërsa pas harmonizimit të programit qeverisës kishin filluar takimet në mes lidershipit të VV-së, Albin Kurtit dhe atij të LDK-së, Isa Mustafës me qëllim të arritjes së koalicionit qeverisës, por deri më tani ende nuk është arritur një gjë e tillë.

Më 20 janar Lëvizja Vetëvendosje e kishte propozuar Albin Kurtin si mandatar për Kryeministër të Kosovës, madje edhe presidenti i Kosovës po atë ditë e dërgoi Dekretin Presidencial me emrin e kandidatit për Kryeministër në Kuvendin e Republikës së Kosovës.

Ndërsa tashmë kanë mbetur edhe një javë deri në skadimin e afatit kushtetues për paraqitjen e kabinetit të ri qeveritar përpara Kuvendit të Kosovës nga i mandatuari për kryeministër Albin Kurti, ende nuk ka marrëveshje për koalicion nga Lëvizja Vetëvendosje dhe Lidhja Demokratike e Kosovës.

As në takimin e së hënës pasdite mes dy liderëve të kësaj partie nuk është arritur dakordimi, ndërsa sot është paralajmëruar një tjetër takim.

Palët janë pajtuar që të zhvillohet një takim bashkë edhe me ambasadorët e Quint-it në Prishtinë si dhe me Shefen e Misionit të BE-së.

Ndryshe, ajo çfarë po mban peng mosarritjen e koalicionit është pozita e kryekuvendarit e cila mbahet nga Glauk Konjufca i VV-së.

Ofertat e tjera që kanë shkuar në adresë të LDK-së nga VV qoftë për marrjen e një ministrie më tepër, ose edhe shtimin e numrit të përgjithshëm të ministrive, nuk janë marrë parasysh nga partia e Isa Mustafës.