Gjykata Kushtetuese ka aprovuar kërkesën e Lëivzjes “Vetëvendosje” për pezullimin e votimit të qeverisë Hoti.

Deputetët e Lëvizjes Vetëvendosje një ditë më parë i janë drejtuar Gjykatës Kushtetuese për interpretim të dekretit të presidentit të Kosovës, Hashim Thaçit për mandatarin Avdullah Hotin.

Ndërsa përmes një postimi në Facebook, Sekretarja organizative e Lëvizjes Vetëvendosje, Vlora Haxhimehmedi ka njoftuar se është shtyrë protesta e qytetarëve dhe aktivistëve të kësaj Lëvizjeje për të kundërshtuar mbajtjen eventuale të seancës së jashtëzakonshme për formim të Qeverisë së re të Kosovës më 2 maj.

Kjo pasi, Gjykata Kushtetuese në Kosovë ka vendosur në favor të kërkesës së Lëvizjes Vetëvendosje për të pezulluar zbatimin e dekretit të presidentit Hashim Thaçi deri më 29 maj, i cili i mundësonte kandidatit të Lidhjes Demokratike të Kosovës, Avdullah Hotit, të formonte qeverinë e re.

“Tash e disa javë është bërë presion i madh nga aktivistë e qytetarë për të dalë në protesta. Kjo u shtua sidomos dje pas paralajmërimit për seancë të jashtëzakonshme për të shtunën me 2 maj. Mirëpo, masa e përkohshme e vendosur nga Gjykata Kushtetuese sot, sigurisht se e shtynë protestën. Ndërkohë, puna e përditshme dhe përgatitjet tona vazhdojnë”, ka deklaruar Haxhimehmedi.