Testi për policë të rinj, drejtori i Policisë: Ishin pyetje kryesisht që mësohen në shkollë fillore dhe të mesme

Ndaj këtyre ankesave se ky test pranues ishte i vështirë, ka folur edhe drejtori i Përgjithshëm i Policisë së Kosovës, Samedin Mehmeti.

Ai ka thënë se konkursi për zyrtarë policor ishte vetëm për 250 vende.

Mehmeti derisa ka raportuar në Komisionin për Çështje të Sigurisë dhe Mbrojtjes, ka deklaruar se për këtë konkurs për policë aplikuan mbi 11 mijë qytetarë.

Po ashtu, sipas tij vetëm 8 mijë i janë nënshtuar testit, ndërkaq vetëm një mijë kandidatë e kanë kaluar.

“Gjatë shqyrtimit të aplikacioneve kemi vërejtur se një numër i madh i kandidatëve ka pasur rezultate të kalueshmërisë së shkollimit të mjaftueshëm apo të mirë. Komisioni e ka bërë publikimin e rezultateve dhe nga 8 mijë kandidatë që i janë nënshtruar 1 mijë e kanë kaluar dhe 7 mijë kanë dështuar. Ka pasur dilema se a e kanë kaluar shumë apo pak. Kemi pasur për bazë rekrutimin e vitit 2014 dhe 2018. Më 2014 janë ftuar 19550 kandidatë prej tyre 2881 e kanë kaluar kurse kanë dështuar 15000. Më 2018 numri i kandidatëve ka qenë 16705, e kanë kaluar 3847 kanë dështuar 9 mijë.

Më 2021 11,291 kanë aplikuar prej të cilëve kanë kaluar 1447”, tha Mehmeti në Komision.

Gjithashtu, drejtori i Policisë së Kosovës ka folur edhe për pohimet se pyetjet e këtij testi ishin të vështira për kandidatët.

Ai shtoi se pyetjet janë bërë në konsultim me profesorët e Fakultet të Edukimit dhe se kanë qenë të natyrës që mësohen në shkollë fillore dhe atë të mesme.

“Pas mbylljes së konkursit është themeluar komisioni përgjegjës për mbarëvajtjen dhe mbikëqyrjen e procesit. Për hartimin e pyetjeve nga matematika dhe gjuha shqipe ka pasur konsultim me profesorët e Fakultetit të Edukimit.

Kurse nga fushat e përgjithshme Policia e Kosovës ka themeluar grupin punues që pyetjet të jenë të thjeshta të përgjithshme pa u thelluar në njohuri akademike, pyetje kryesisht që mësohen në shkollë fillore apo të mesme. Në këtë test me shkrim janë hartuar 6 mijë pyetje. Testi është përbërë nga 100 pyetje, dhe ishte koha 2:30 orë”, tha ai.