Sigurimi i PDK-së sulmon fizikisht gazetarin e T7!

Sigurimi i PDK-së sulmon fizikisht gazetarin e T7!
Herolind Bytyçi

22.08.2019 / Lajme

Gazetari i T7-shit, Mirlind Behluli, është sulmuar fizikisht nga truprojat e kreut të PDK-së, Kadri Veseli, përderisa po e kryente detyrën e tij të gazetarit.

Behluli derisa po raportonte nga njëri nga lokalet e Prishtinës, aty ku po qëndronte Veseli, është sulmuar nga sigurimi duke u larguar me forcë nga lokali. E gjithë ngjarja ishte live.

“Na larguan me forcë dhe më goditën pas kokës”, ka deklaruar Behluli.

Ndërsa ditën e djeshme PDK përmes një njoftimi u ka bërë thirrje të gjithë qytetarëve të Kosovës që t’i marrin me rezervë lajmet e Gazetës Express.

Zgjedhjet po afrohen, fushata elektorale ka filluar dhe bashkë me të lajmet e rreme dhe të porositura. Partia Demokratike e Kosovës vlerëson lart rolin e mediave në demokracinë e Kosovës dhe mbron bindshëm lirinë e fjalës. Madje, i respekton mediat edhe kur ato kanë anësi politike. Por, nuk do të pranojë manipulimin me lajme të rreme nga Gazeta Express.

Kjo web-faqe tashmë një kohë është futur në këtë valle me mision të qartë të goditjes së PDK-së me një armiqësi të pakuptueshme. Prandaj, ne u bëjmë thirrje të gjithë qytetarëve të Kosovës që t’i marrin me rezervë lajmet e Gazetës Express.

Zgjedhjet në Kosovë duhet të jenë festë, qytetarët duhet të zgjedhin më të mirën. Partia Demokratike e Kosovës, pavarësisht çfarëdo koalicioni që bëjnë partitë tjera, ka për qëllim që nga këto zgjedhje të fitojë Kosova dhe Kosova fiton vetëm me PDK-në.

Me këtë rast, Partia Demokratike e Kosovës përsërit edhe një herë, në mënyrë të vendosur dhe pa ekuivok, se kandidati i vetëm për Kryeministër është Kadri Veseli.

Kadri Veseli me vullnetin e qytetarëve do të jetë Kryeministër i Republikës së Kosovës. Në Qeverinë e ardhshme, me Kryeministër Kadri Veselin, lufta ndaj korrupsionit do të jetë pa kompromis dhe mediat e lira e vërtet profesionale të Kosovës do të jenë aleate në përpjekjet për të garantuar sundimin e ligjit dhe një të ardhme më të mirë për rininë e Kosovës” thuhet në njoftimin e PDK-së.

RAPORTO