Shteti i Kosovës me shkallë më të lartë të papunësisë në rajon

Papunësia vazhdon ende të jetë aktive në shtetin e Kosovës dhe shtetet e tjera përreth, por shkalla e papunësisë në Kosovë është më e larta në krahasim me vendet e tjera.

Siç dihet, Kosova ka popullsi prej 1.739.825 banorë, ndërsa duke i shikuar statistikat e papunësisë në përqindje, rreth 30.7% e popullsisë së Kosovës është e papunë, kurse shteti fqinjë, Maqedonia ka popullsi prej 2 Milionë e 75 mijë banorë, dhe në statistikat e papunësisë, rreth 20% e popullsisë së Maqedonisë është e papunë.

Për këtë shkallë të lartë të papunësisë, qytetarët e të dy vendeve fajësojnë institucionet për gjendjen e rëndë të papunësisë.

Avni Hajdari, qytetar nga Prishtina, e quan shqetësuese situatën e papunësisë. Madje, ai shprehet skeptik se një gjë e tillë do të përmirësohet gjatë vitit 2019. “Në bazë të këtij zhvillimi ekonomik nuk besoj që do të ketë ndonjë rritje të madhe të vendeve të punës në vitin e ardhshëm. Shumica po tentojnë me ik jashtë duke mos pasur perspektivë të punësimit këtu në Kosovë”, tha Hajdari.

Një qytetar fajtor e bën qeverisjen, ku ai tha se vende të punës kanë vetëm ata që e qeverisin vendin. “Vetëm për pushtetarë ka vende të lira të punës, për neve punëtorëve jo, njerëzve të thjeshtë jo”, tha ai.

Derisa në Kosovë, thuhet se ka pasur rritje të shkallës së papunësisë, në Maqedoni gjatë tre mujorit të tretë të vitit të kaluar, ka pasur ulje të papunësisë. Mirëpo, edhe qytetarët e Maqedonisë fajësojnë institucionet e tyre.