Rreth 4 mijë e 600 kosovarë këtë vit hoqën dorë nga shtetësia

Edhe viti 2021 ndryshe njihet si vit pandemik, pasiqë gjendemi ende në mesin e virusit COVID-19, por ndonëse ka masa kufizuese në shumë vende të botës, një gjë e tillë qytetarët e Kosovës nuk i ka penguar që të heqin dorë nga shtetësia.

Vetëm gjatë këtij viti rreth 4 mijë e 600 kosovarë kanë hequr dorë nga shtetësia, ku ky numër është dukshëm më i lartë se një vit më heret, kur nga shtetësia kishin hequr dorë 3 mijë e 600 persona.

Për heqje dore nga shtetësia e Kosovës janë dhënë disa arsyeje, sipas zyrtarëve të Ministrisë së Punëve të Brendshme (MPB) arsyeja kryesore për të hequr dorë nga shtetësia, është mos lejimi i dy shtetësisë në shtete të ndryshe, e kjo kryesisht në shtete të Bashkimit Evropian, që kanë migruar shumë kosovarë.

Ndryshe nga viti 2020, kur nga shtetësia e Kosovës hoqën dorë rreth 3 mijë e 600 persona, numri i kosovarëve që janë liruan nga shtetësia deri në fund të nëntorit të këtij viti, është dukshëm më i lartë se vitin e kaluar.

Behar Haziraj, zyrtar i lartë për media në Ministrinë e Punëve të Brendshme dhe Administratës, në një prononcim për Radio Kosovën, tregon numrin e atyre që për arsye të ndryshme hoqën dorë nga shtetësia.

“Gjatë periudhës Janar – Nëntor të vitit 2021, nga Shtetësia e Republikës së Kosovës, janë liruar gjithshej 4 mijë e 594 persona. Prej tyre, meshkuj janë 2 mijë e 359, ndërsa 2 mijë e 235 janë femra. Këto janë të dhëna statistikore të përpunuara deri në muajin nëntor, ndërsa meqë muaji dhjetor nuk ka përfunduar ende, të dhënat për këtë muaj nuk i kemi”, tha ai.

Arsyeja kryesore që shtyn kosovarët të heqin dorë nga shtetësia është ndalimi i dy shtetësisë në shumë vende të BE-së, pohon Haziraj.

“Arsyet pse këta personat heqin dorë nga shtetësia e Kosovës, është pasi që shumë shtete të Bashkimit Evropian nuk lejojnë dy shtetësinë, përfshirë këtu edhe disa shtete që nuk janë pjesë e BE-së. Duke pasur parasysh që një numër i madh i shtetasve tonë jetojnë tashmë me vite në këto shtete, e një numër i madh edhe kanë lindur në këto shtete dhe si rezultat i saj kanë fituar të drejtën e Fitimit të Shtetësisë dhe janë të obliguar të lirohen nga shtetësia e mëparshme në rast se dëshirojnë ta fitojnë shtetësinë e atij vendi”, tha Haziraj.

Gjatë periudhës Janar – Nëntor 2021, Shtetësinë e Kosovës, e kanë fituar 362 persona. Ndërkohë, sipas të dhënëva të MPB-së, nga 2017 e deri në vitin 2020, nga shtetësia kanë hequr dorë 20 mijë e 113 kosovarë.