Qeveria vendos të marrë 60 milionë euro kredi për blerjen e vaksinave anti-COVID

Gjatë ditës së sotme Qeveria e Kosovës ka mbajtur mbledhje në të cilën ndër tjerash është diskutuar edhe për sigurimin e vaksinave anti-COVID.

Në mbledhje është miratuar nisma për negocimin e marrëveshjes kornizë së kredisë së datës 14 gusht të vitit 2020 ndërmjet Kosovës dhe Bankës Zhvillimore të Këshillit të Evropës për financimin e projektit “Reagim Emergjent ndaj Covid-19”.

Ministri i Financave, Hekuran Murati tha se nevojiten 25 milionë euro shtesë, nga 60 milionë sa ka kosto i tërë projekti.

“Tërë projekti kap vlerën prej 60 milionë euro, kemi 35 milion euro tashmë të negociuara, të nënshkruara dhe ratifikuara në Kuvend dhe po bëhet fjalë për një shtesë 25 milionë eurove që sigurohen me këtë amendamentim”, tha Murati.

Ai shtoi se kjo do të ndihmojë në blerjen e vaksinave anti-COVID-19, sipas marrëveshjeve që negociohen nga Ministria e Shëndetësisë.