Punëtorit i bie shtylla në kokë gjatë punës në Lubizhdë, përfundon në QKUK në gjendje të rëndë

Ai ndodhet aktualisht në gjendje të rëndë në Qendrën Klinike Universitare të Kosovës (QKUK) në Prishtinë, nën përkujdesje intensive mjekësore.

Dje, rreth orës 13:00 të datës 20 qershor 2025, Policia është njoftuar për një të lënduar rëndë gjatë punimeve ndërtimore. Viktima, me inicialet Z. K., 46-vjeçar, punëtor i kompanisë “Adioni Group SHPK”, ka marrë një goditje në kokë nga një shtyllë druri, rreth 6 metra e gjatë, e cila kishte rënë nga tavani i objektit ku po punohej.

Fillimisht, ai ishte dërguar në Spitalin e Gjakovës, por për shkak të lëndimeve të rënda, është transferuar menjëherë në QKUK – Prishtinë. Burimet mjekësore bëjnë të ditur për Sinjalin se gjendja e tij shëndetësore vazhdon të jetë e rëndë.

Në lidhje me këtë rast, Gazeta Sinjali ka kontaktuar edhe me kompaninë “Adioni Group SHPK”. Djali i pronarit të kësaj kompanie është shprehur: “Nuk kam qenë në momentin kur ka ndodhur lëndimi, por nuk është se ka qenë ndonjë lëndim i madh.” Kur u pyet nëse është e mundur të bisedohet me pronarin e kompanisë, ai u përgjigj se aktualisht kjo nuk është e mundur, duke shtuar: “Ka qenë baba im, që e ka dhënë deklaratën në polici. Jo. Për zotin, se di a e ka telefonin me veti dhe është në Shqipëri. S’kam informacione pa u forcu pa e dhënë deklaratën vet, kurse ai e jep deklaratën më së miri.”

Lidhur me rastin, në vendin e ngjarjes kanë dalë Sektori i Hetimeve Rajonale të Prizrenit, njësia e krimteknikës, si dhe inspektorët e punës, të cilët kanë kryer këqyrjen e vendit të incidentit. Sipas hetimeve fillestare, kompania nuk kishte respektuar të gjitha standardet e sigurisë në punë. Për këtë arsye, është iniciuar rasti “Asgjësim, dëmtim ose heqje e pajisjeve mbrojtëse dhe rrezikimi i sigurisë në vendin e punës” ndaj pronarit të kompanisë, Fitim S. rreth 41-vjeçar, i cili për momentin ndodhej në QKUK përkrah viktimës dhe nuk është intervistuar ende.