Presidentja Osmani në Washington: Kosova, kombi më pro-amerikan në botë

Në një fjalim të mbajtur në Forumin Ndërparlamentar të Sigurisë në Washington D.C., Osmani theksoi angazhimin e palëkundur të Kosovës për mbrojtjen e vlerave amerikane dhe ruajtjen e paqes në Ballkanin Perëndimor.

“Kosova ka bërë Amerikën krenare duke mbrojtur këto vlera të njëjta, duke pasur supet tona pranë ushtarëve tuaj krah për krah nëpër botë. Duke siguruar që së bashku mbrojmë paqen në mbarë botën”, tha Osmani, duke theksuar se Kosova ka një shkallë miratimi prej 98% për udhëheqjen amerikane.

Ajo theksoi se mbështetja e SHBA-ve ka qenë e paçmuar, veçanërisht në kohë të vështira, dhe se Kosova ka qëndruar gjithmonë krah Shteteve të Bashkuara në përpjekjet për të mbrojtur lirinë dhe paqen.

Presidentja Osmani gjithashtu bëri të qartë se Kosova ka refuzuar ndikimet negative të Kinës dhe Rusisë, duke e mbajtur kursin e saj drejt një të ardhme evropiane dhe demokratike. “E vetmja që ka kundërshtuar tërësisht ndikimin e keq ekonomik të Kinës… dhe nuk kemi lejuar asnjë ideologji iraniane të ketë ndonjë ndikim mbi vendin tonë”, tha ajo.

Duke shprehur shqetësimin e Kosovës për ndikimin në rritje të Serbisë nga Rusia dhe Kina, Osmani theksoi se Serbia ka ndërtuar lidhje të plota ushtarake, ekonomike dhe politike me Kinën, ndërsa Kosova ka bërë të kundërtën, duke mos iu bashkuar nismave kineze.

Osmani bëri thirrje për investime amerikane në infrastrukturën kritike të Kosovës, si një mënyrë për të forcuar stabilitetin dhe për të penguar ndikimet negative të aktorëve të tjerë globalë. “Populli ka shpresa të larta që do të kemi më shumë investime amerikane në rajonin tonë. Kjo do të thotë mbështetje të vazhdueshme për forcat e paqes që janë tashmë të angazhuara për paqe dhe stabilitet”, tha ajo.

Ajo theksoi se bashkëpunimi i ngushtë me Shtetet e Bashkuara është çelësi për të ruajtur paqen në Ballkan dhe në Evropë, duke theksuar se një stabilitet i tillë është esencial për përparimin e të ardhmes evropiane të Kosovës dhe për një botë më të sigurt. “Koordinimi me Shtetet e Bashkuara është çelësi. Nuk është vetëm i nevojshëm për ne si vend, por është ekzistencial”, përfundoi Osmani.