Presidentja Osmani në Mynih, takim me Komandantin Suprem të NATO-s dhe kongresistë amerikanë

Një nga takimet e spikatura ishte ai me Gjeneralin Christopher Cavoli, Komandantin Suprem të Forcave Aleate për Evropë (SACEUR) në NATO. Gjatë këtij takimi, Presidentja Osmani ka diskutuar mbi rolin e pazëvendësueshëm të NATO-s në Kosovë gjatë 23 viteve të fundit, duke theksuar kontributin e aleancës në mbrojtjen e sigurisë dhe stabilitetit të vendit.

“Në këtë kohë përcaktuese për kontinentin evropian, riafirmova përkushtimin e institucioneve të Republikës së Kosovës për një bashkëpunim të ngushtë me aleancën, duke kontribuar aktivisht në sigurinë e rajonit dhe më gjerë,” ka shkruar Presidentja Osmani në një njoftim në Facebook.

Përveç takimit me Gjeneralin Cavoli, Presidentja Osmani ka zhvilluar edhe takime të tjera të rëndësishme, duke përfshirë një takim me një delegacion të kongresistëve amerikanë. Ajo ka shprehur mirënjohjen e thellë për mbështetjen e vazhdueshme të Kongresit Amerikan për Kosovën, duke theksuar se kjo mbështetje ka luajtur një rol kyç në historinë e Kosovës së lirë, të pavarur dhe sovrane.

“Mbështetja e Kongresit Amerikan ka luajtur një rol kyç në shkrimin e historisë së Kosovës së lirë, të pavarur dhe sovrane. Kjo mbështetje vazhdon edhe sot, ndërsa punojmë së bashku për të adresuar sfidat e përbashkëta dhe për të hapur kapituj të rinj bashkëpunimi që thellojnë dhe fuqizojnë më tej aleancën tonë historike,” ka shkruar Presidentja Osmani.

Në kuadër të Konferencës së Sigurisë në Mynih, Presidentja Osmani ka takuar gjithashtu deputetët Annette Widmann-Mauz dhe Jurgen Hardt nga radhët e CDU-së. Ajo ka theksuar se bashkëpunimi me Gjermaninë mbetet një nga prioritetet kryesore të Kosovës, duke vlerësuar kontributin e CDU-së në kultivimin e marrëdhënieve bilaterale ndër vite.

“Bashkëpunimi me Gjermaninë mbetet një nga prioritetet kryesore, e CDU si parti ka kontribuar ndër vite në kultivimin e marrëdhënieve tona bilaterale,” ka shkruar Presidentja Osmani.