Pesë raste të dhunës në familje raportohen në 24 orët e fundit në Kosovë
Pesë raste të dhunës në familje janë raportuar gjatë 24 orëve të fundit në Kosovë, sipas raportit të fundit 24 orësh të Policisë.
Foto: Ilustrim
Tre nga rastet janë evidentuar në Prishtinë, ndërsa nga një rast është raportuar në Pejë dhe Gjakovë.
Në Prishtinë, më 16 korrik 2025, një burrë dyshohet se ka ushtruar dhunë ndaj një gruaje. Rasti është iniciuar në konsultim me Prokurorin, ndërsa i dyshuari ndodhet në kërkim policor.
Një tjetër rast dhune ndaj një gruaje është raportuar në të njëjtin qytet më 17 korrik 2025. Edhe në këtë rast, i dyshuari është në kërkim nga autoritetet, ndërsa çështja po trajtohet nga ekipet relevante.
Rasti i tretë i raportuar në Prishtinë përfshin dy gra, të cilat më 17 korrik janë përfshirë në një përleshje fizike pas një mosmarrëveshjeje verbale. Të dyja janë shoqëruar në Stacionin Policor dhe pas intervistimit, në konsultim me Prokurorin, janë liruar në procedurë të rregullt.
Në Pejë, një burrë është arrestuar më 17 korrik 2025, pasi dyshohet se ka sulmuar fizikisht një grua pas një mosmarrëveshjeje. Si i dyshuari, ashtu edhe viktima, kanë pësuar lëndime dhe janë trajtuar mjekësisht. Pas intervistimit, i dyshuari është liruar në procedurë të rregullt.
Ndërkohë, në Gjakovë, më 17 korrik është arrestuar një grua nën dyshimin se ka ushtruar dhunë ndaj një burri. Sipas Policisë, rasti kishte ndodhur më shumë se një muaj e gjysmë më parë, ndërsa viktima ka refuzuar trajtimin mjekësor. E dyshuara është liruar në procedurë të rregullt pas intervistimit dhe konsultimit me Prokurorin.
Autoritetet vazhdojnë trajtimin e rasteve në bashkëpunim me institucionet përkatëse, ndërsa apelojnë për raportim të menjëhershëm të çdo forme dhune në familje.
