Paralajmërohet rritja e mëtejshme e çmimit të derivateve në Kosovë

Xhepi i qytetarëve po rëndohet dita e ditës edhe më shumë, tashmë për një litër naftë apo benzinë duhet paguar edhe disa centë më shumë.

Por, një rritje e tillë nuk e ka ndërmend të ndalet me kaq, pasiqë çmimi i derivateve mund të rritet përsëri, por nëse kjo arsyetohet me lëvizjet e çmimeve në tregjet ndërkombëtare dhe situatën e tensionuar Rusi-Ukrainë, qytetarët dhe shoqatat që mbrojnë konsumatorët kërkojnë ndërhyrjen e shtetit.

Fadil Berjani, kryetar i Shoqatës së Naftëtarëve ka theksuar se çmimi aktual në vendin tonë është më i liri në rajon, por i njëjti paralajmëron se rritja apo shtrenjtimi i naftës do të vazhdojë edhe më tutje, e sipas tij mund të jetë edhe në nivele të papara ndonjëherë.

Berjani tha se çmimin e përcakton bursa dhe organizata prodhuese, duke shtuar se çmimet sillen përafërisht në Kosovë 1.23 dizelli deri 1 euro e 30 centë, ndërkaq benzina 1.25 deri në 1 euro e 35 centë.

Po ashtu, ai ka shtuar se në vend i kemi çmimet më të lira në rajon.

“Dihet se çmimin e përcakton bursa dhe organizata prodhuese, sot çmimet sillen përafërsisht në Kosovë 1.23 dizelli deri 1 euro e 30 centë, ndërsa benzina 1.25 deri në 1 euro e 35 centë […] Është duke u rritur çmimi në mënyrë të theksuar, kemi rritje të derivateve të naftës me shumicë çdo ditë 25 dollarë në të, ndërsa me pakicë nuk ka lëvizje që një javë, por kjo nuk është duke ndodhur vetëm në Kosovë por në tërë globin, do të thotë në tregjet ndërkombëtare çmimi po rritet gjithashtu po reflekton edhe tek ne në Kosovë.

Çmimet ne i kemi më të lirat në rajon […] Por edhe situata e krijuar Ukrainë-Rusi edhe kjo ka ndikim tek çmimet. Sipas të gjitha gjasave do të ketë rritje ekstreme, por dihet që muajin dhjetor organizata prodhuese OPEC ka thënë se në muajin janar do të stabilizohet tregu, por kjo nuk është duke ndodhur”, u shpreh Berjani.

Rritja e çmimit të karburanteve, që është paraprirë nga rritja e çmimeve të produkteve të tjera është e papërballueshme për qytetarët.

Selatin Kaçaniku nga shoqata “Konsumatori” kërkon që shteti të mos mbyllë sytë dhe veshët përballët rritjes së çmimeve. Ai kërkon që të ndërhyhet me politika fiskale si dhe të ketë monitorim më të madh të kompanive që merren me tregtimin e derivateve.

“Naftëtarët kanë qenë të përbetuar vite më parë se nuk fitojnë më shumë se 6,7,8 maksimumi 9 centë për litër dhe nëse diferenca është 9 centë, atëherë ja ku po qëndron problemi. Dikush këtu nuk po e thotë të vërtetën dhe kur dikush nuk e thotë të vërtetën qeveria, Agjencioni i Konkurrencës të gjitha këto të vijnë në veprim[…] Xhepi i qytetarit ka falimentuar, 30 e sa përqind që kanë jetuar në varfëri, tani kanë falimentuar dhe ai tani nuk ka xhep, e ka një pus pafund i cili më nuk zë para”, tha ai për KosovaPress.

Gjithashtu, ai tha se: “Qeveria duhet ta bëje atë për çka e kemi votuar të na dëgjojë dhe mos të jetojë larg nesh ose në distancë prej nesh, por le ta di se ka qenë dhe akoma është pjesë e popullit, pjesë e sovranit, qytetarit dhe familjes konsumatore. Qeveria duhet të na bind që po bashkëjeton me ne e mos të na bind që po debaton me ne nga distanca, kjo qeveri na duhet”.