Osmani takon presidentin e Sierra Leones, shtet që Serbia pretendoi se e ka çnjohur Kosovën

Osmani, përmes një postimi në rrjetin social Facebook, ka shprehur kënaqësinë e saj për takimin, duke theksuar se kanë diskutuar për forcimin e marrëdhënieve dypalëshe dhe mundësitë konkrete të bashkëpunimit në fusha të ndryshme të interesit të përbashkët. Ajo gjithashtu ka zbuluar se janë shkëmbyer ftesa për vizita zyrtare në të dyja shtetet, me qëllim thellimin e lidhjeve miqësore dhe hapjen e kapitujve të rinj të bashkëpunimit.

Ky zhvillim sfidon drejtpërdrejt narrativën e Serbisë, e cila ka përfshirë Sierra Leonen në listën e vendeve që gjoja kanë tërhequr njohjen e Kosovës. Ish-ministri i Jashtëm serb, Ivica Daçiq, kishte bërë publik këtë pretendim më 3 mars 2020, duke hedhur dyshime mbi statusin e njohjes së Kosovës nga Sierra Leone.

Njohja nga Sierra Leone ishte zyrtarizuar më 11 qershor 2008, dhe takimi i fundit mes dy presidentëve konfirmon ekzistencën e marrëdhënieve diplomatike dhe vullnetin për thellimin e tyre, duke hedhur poshtë pretendimet e Serbisë për tërheqje të njohjes. Ky takim shërben si një demonstrim i qartë i mbështetjes së vazhdueshme të Sierra Leones për pavarësinë e Kosovës dhe si një hap përpara në forcimin e lidhjeve mes dy vendeve.