Osmani i kërkon Qeverisë të pezullojë taksën 10% ndaj mallrave të SHBA-së

Kjo kërkesë vjen në një kohë kur administrata e ish-presidentit amerikan, Donald Trump, ka vendosur tarifa të reja për të gjitha importet në SHBA, duke përfshirë edhe Kosovën.

Në një deklaratë për media, Osmani ka theksuar rëndësinë e këtij veprimi si një mesazh të qartë për partneritetin e fortë mes Kosovës dhe SHBA-së. “Sot, zyrtarisht i kërkova Qeverisë së Kosovës që të pezullojë tarifat e importit për të gjitha produktet amerikane – një hap i rëndësishëm për të thelluar lidhjet ekonomike me aleatin tonë më të ngushtë dhe për të dërguar një mesazh të qartë: Kosova është e gatshme për një marrëdhënie më të fuqishme me Shtetet e Bashkuara, me një vizion të qartë që do t’i bënte të dyja vendet tona më të forta, më të sigurta dhe më të begata,” ka deklaruar Osmani.

Presidentja Osmani ka shprehur bindjen se kjo lëvizje do të hapë mundësi të reja për krijimin e vendeve të punës, shkëmbimin e teknologjisë dhe rritjen ekonomike afatgjatë. “Më shumë se një lëvizje ekonomike, ky është një objektiv i politikës së jashtme, duke riafirmuar përkushtimin tonë të qëndrueshëm ndaj aleancës Kosovë-SHBA, e ndërtuar mbi vlerat e përbashkëta të lirisë dhe dekada të mbështetjes së palëkundur,” ka shtuar ajo.

Vendimi i Osmanit vjen në një moment të ndjeshëm për tregtinë globale, pas vendimit të administratës Trump për të vendosur tarifa më të larta për vendet që ai i konsideron si “shkelësit më të këqij”. Ky veprim i presidentes Osmani synon të ruajë dhe forcojë marrëdhëniet ekonomike dhe politike me SHBA-në, duke dërguar një sinjal pozitiv në një kohë të pasigurt për tregtinë ndërkombëtare.