Nga 12 Tetori nis zbatimi i sistemit EES në pikat kufitare të BE – MPB njofton qytetarët e Kosovës
Ministria e Punëve të Brendshme e Republikës së Kosovës ka njoftuar se duke filluar nga data 12 tetor 2025, në disa pika kufitare të Bashkimit Evropian do të nisë zbatimi i sistemit të ri Entry/Exit System (EES).
Foto: Ilustrim
Ky sistem do të zbatohet fillimisht në disa pika kufitare kryesore të BE-së, ndërsa në periudhën gjashtëmujore të ardhshme do të zgjerohet në të gjitha pikat kufitare të vendeve anëtare të Unionit.
Sistemi EES është një sistem biometrik, i cili synon të regjistrojë hyrjet dhe daljet e shtetasve të vendeve jo-anëtare të BE-së. Gjatë kontrollit kufitar, përmes këtij sistemi do të mblidhen shenjat e gishtërinjve dhe fotografi, duke zëvendësuar procesin aktual të vulosjes së pasaportave dhe duke përshpejtuar procedurat në kufi.
Ministria e Punëve të Brendshme ka bërë thirrje që qytetarët e Kosovës të jenë të informuar dhe të përgatitur për këto ndryshime kur udhëtojnë drejt vendeve të Bashkimit Evropian, pasi sistemi EES pritet të ndikojë në mënyrën e kontrollit kufitar.
MPB ka siguruar se do të vazhdojë të monitorojë zbatimin e këtij procesi dhe të informojë rregullisht qytetarët për çdo zhvillim të ri që ndërlidhet me lëvizjen drejt zonës së BE-së.
