Gjykata Speciale shpall sot vendimin për Gucatin dhe Haradinajn

Me fillim nga ora 10:00 do të bëhet shpallja e aktgjykimit, ku Haradinaj e Gucati po akuzohen për vepra penale që ndërlidhen me pengimin e administrimit të drejtësisë.

Zyra e Prokurorit të Specializuar (ZPS) ka kërkuar që Gucati dhe Haradinaj të dënohen me nga 6 vjet burgim si dhe nga 100 euro gjobë.

Të akuzuarit në fjalë vazhdojnë të jenë nën masën e paraburgimit në Hagë dhe tashmë janë edhe në pritje të shqiptimit të vendimit të gjykatës.

Hysni Gucati dhe Nasim Haradinaj janë duke u akuzuar për vepra penale kundër administrimit të drejtësisë, përkatësisht për pengim të personave zyrtarë në kryerjen e detyrave zyrtare, po ashtu për frikësim të dëshmitarëve, për hakmarrje dhe për shkelje të fshehtësisë së procedurës.

“Akuzat e paraqitura në aktakuzën e konfirmuar mbështeten në dyshimin e bazuar mirë se së paku midis 7 dhe 25 shtatorit 2020, z. Gucati dhe z. Haradinaj zbuluan pa autorizim informacion të mbrojtur prej Ligjit të Dhomave të Specializuara, ndër të cilat të dhëna identifikuese të disa dëshmitarëve (të mundshëm), në tre konferenca shtypi dhe aktivitete të tjera të transmetuara, si edhe përmes shpërndarjes së mëtejshme ku përfshihen deklaratat në rrjetet sociale”, thuhej në njoftimin e Dhomave të Specializuara.

Të akuzuarit ngarkohen se kundër dëshmitarëve të mundshëm kanë bërë komente nënçmuese dhe kjo në mënyrë të përsëritur shprehen synimin e tyre për të dëmtuar punën e Dhomave të Specializuara.

“Me këto veprime, z. Gucati dhe z. Haradinaj shkelën fshehtësinë e procedurës dhe frikësuan dëshmitarë (të mundshëm) të Zyrës së Prokurorit të Specializuar dhe si pasojë penguan punën dhe hetimet e ZPS-së”, thuhej në njoftimin e Dhomave të Specializuara të Kosovës.