Në asnjë qytet përfshirë edhe Suharekën nuk ka asnjë qytetar të prekur nga “virusi i Nilit Perëndimor”

Për momentin Kosova nuk e ka asnjë qytetar të prekur nga “virusi i Nilit Perëndimor”, i cili është përhapur në disa vende të Ballkanit.

Por zyrtarët e Institutit Kombëtar të Shëndetit Publik u bëjnë thirrje qytetarëve që të kenë kujdes nga pickimi i mushkonjave të infektuara, të cilat janë bartëse të këtij virusi.

Asnjë qytetar i Kosovës nuk është prekur nga “virusi i Nilit Perëndimor”, i cili shkakton sëmundje neurologjike, që mund të përfundojnë edhe me fatalitet, ka konfirmuar për Radio Kosovën zëdhënësja e Institutit Kombëtar të Shëndetit Publik, Era Pireva.

Megjithatë, ajo u ka bërë thirrje qytetarëve që të kenë kujdes nga pickimi i mushkonjave të infektuara.

“Instituti Kombëtar ka bërë thirrje te qytetarët se “virusi i Nilit” është shfaqur në Ballkan. Virusi i Nilit mund të shkaktojë sëmundje fatale neurologjike te njerëzit, megjithëse rreth 80 për qind e njerëzve të infektuar nuk tregojnë asnjë simptomë. Virusi i Nilit transmetohet te njerëzit kryesisht nëpërmjet pickimit të mushkonjave”, ka thënë Pireva.

Pireva u ka bërë thirrje qytetarëve të Kosovës që të kenë kujdes edhe gjatë kontaktit me kafshët, transfuzionit të gjakut apo gjatë kontrolleve mjekësore.

“Në mungesë të vaksinës, mënyra e vetme për të zvogëluar infeksionin në njerëz është përmes vetëdijesimit dhe edukimit të popullatës. Zvogëlimin e rrezikut ndaj bartjes përmes mushkonjave, angazhimin për parandalimin e transmisionit dhe së pari të fokusohen në mbrojtjen personale dhe të bashkësisë ndaj pickimit të mushkonjave. Në përdorimin e rrjetave, repelentëve, rrobave të lehta me mangë të gjata dhe shmangien e aktiviteteve të jashtme”, ka shtuar Pireva.

Infektimi me VNP mund të jetë pa simptoma në rreth 80% të njerëzve të infektuar, ose mund të çojë në ethet e Nilit Perëndimor ose në sëmundje të rënda të Nilit Perëndimor. Simptomat përfshijnë temperaturë, dhembje koke, lodhje dhe dhembje të trupit, të përziera, të vjella, herë pas here skuqje të lëkurës dhe ënjtje të gjëndrave limfatike.

Aktualisht vaksinat kundër këtij virusi janë në përdorim për kuaj, por jo edhe për njerëz.

RAPORTO