Naftëtarët paralajmërojnë mbyllje të pompave nëse nuk merren parasysh kërkesat e tyre

Ndërhyrja e Qeverisë në tregun e derivateve ka nxitur naftëtarët të diskutojnë ndërmarrjen e masave ekstreme, duke përfshirë mundësinë e mbylljes së pikave të derivateve në të gjithë Kosovën.

Në një deklarim për “Nacionalen” të enjten, kreu i Shoqatës së Naftëtarëve, Fadil Berjani, tha se masa e mbylljes së pompave të derivateve do të vendoset nga përfaqësuesit e Shoqatës në mbledhjen e sotme.

“Mbyllja e pompave nuk varet nga unë. Në 09:30 do të flasim. Varet nga të gjithë. Unë i udhëheq politikat e Shoqatës së Naftëtarëve. Vendimin do ta marrin të gjitha kompanitë që do të jenë të pranishme. Sot do të vendosin çka do të bëjnë e si do të sillen. Por, unë mendoj që kryeministri Kurti nuk e merr një vendim që dëmton biznesin. Jam i bindur”, tha Berjani.

Ata kanë përmendur vendet e rajonit dhe të BE-së si shembull, të cilët kanë ulur akzicën për produktet e naftës. Gjithashtu ata kanë kërkuar që të vazhdohet me ekonominë e tregut të lirë, në pajtim, siç kanë thënë ata, me Kushtetutën e Kosovës.

“Nëse kërkesa nuk merret parasysh nga Qeveria atëherë kërkesat tona janë që minimalisht marzhat të caktohen si më poshtë, duke u bazuar në nivelet e çmimieve aktuale: Shitja me shumicë 3%; Shitja me pakicë 12%”, thuhet në letrën drejtuar Qeverisë.

Tutje, naftëtarët kanë thënë se janë të detyruar të mbrojnë ekzistencën e kompanive të tyre, siç janë shprehur ata, nëse nuk merren parasysh kërkesat drejtuar sot Qeverisë.

“Apelimi i vendimit të datës 1 mars 2022, për kompensimin e humbjeve të shkaktuara nga ky vendim; Apelim i vendimit të ri, nëse merret duke shpërfillur kërkesat tona; Mbyllja e pikave të derivateve në tërë territorin e Kosovës, deri në reflektim të Qeverisë, kjo me qëllim të shmangjes së falimentimit”, janë kërkesat e Shoqatës së Naftëtarëve.

“Industria e naftës për shkak të inflacionit të përgjithshëm vetëm se është duke u ballafaquar me rritje enorme të kostove qoftë të pagave, normave të interest, shpenzimeve të mirëmbajtjes etj. Kjo e kombinuar me kufizim të marzhës së fitimit do të ketë efekte shkatërruese për kompanitë e naftës”, thuhet në dokument.

Ministria e Industrisë, Ndërmarrësisë dhe Tregtisë (MINT) dje ka thënë se është duke punuar për vendimin e ri për rregullimin e çmimeve të naftës që do të “mbrojë konsumatorët dhe konkurrencën sipas ligjit”.

Portali Buletini Ekonomik, duke u bazuar në një draft të këtij vendimi, ka raportuar se ai parasheh kufizime në fitimet e naftëtarëve.

Së paku 2 deri 3 centë do të jetë fitimi për një litër naftë për shitësit me shumicë, ndërsa 6-10 centë do të jetë fitimi për litër për shitësit me pakicë.

Ndërsa 10 centë për litër do të jetë fitimi për shitje me pakicë për subjektet që nuk janë importuese.