LIVE – Filloi seanca e konstituimit të Kuvendit të Kosovës

12:00 Komisioni i përkohshëm për verifikimin e kuorumit dhe mandateve të deputetëve ka konfirmuar sot se mandatet e 120 deputetëve të zgjedhur në legjislaturën e nëntë të Kuvendit të Kosovës janë në rregull. Lajmin e bëri të ditur kryesuesi i këtij komisioni, Artan Abrashi.

Sipas Abrashit, komisioni ka shqyrtuar dokumentacionin e nevojshëm zgjedhor, përfshirë vendimin e Komisionit Qendror të Zgjedhjeve (KQZ) për certifikimin e rezultateve përfundimtare dhe listën e deputetëve. Ai theksoi se në këtë legjislaturë janë certifikuar gjithsej 120 deputetë.

Megjithatë, Abrashi njoftoi se raporti i këtij komisioni, i cili konfirmon rregullsinë e mandateve, është kundërshtuar nga tri parti opozitare: PDK, LDK dhe AAK. Arsyet e kundërshtimit nga ana e këtyre subjekteve nuk u bënë të ditura menjëherë.

“Komisioni i përkohshëm për verifikimin e kuorumit dhe mandatave të deputetëve, paraqet këtë raport që kaloi me shumicë votash, ani pse u kundërshtua nga PDK, LDK e AAK,” deklaroi Abrashi.

Pavarësisht kundërshtimeve, kryesuesi i komisionit siguroi se Kuvendi i Kosovës mund të vazhdojë me punimet e planifikuara sipas rendit të ditës. Konfirmimi i mandateve është një hap i rëndësishëm për funksionimin e plotë të legjislativit dhe proceseve të tjera kushtetuese në vend.

Mbetet të shihet se si do të zhvillohen më tej diskutimet lidhur me kundërshtimin e opozitës ndaj raportit dhe nëse kjo do të ndikojë në dinamikën e punës së Kuvendit në ditët në vijim.

11:15 Partitë e përfaqësuara në Kuvendin e Kosovës kanë propozuar emrat e tyre për anëtarë të Komisionit të përkohshëm për verifikimin e kuorumit dhe të mandateve të deputetëve.

Ky komision udhëhiqet nga LVV-ja, partia fituese e zgjedhjeve. Formimi i këtij komisioni është pika e parë e rendit të ditës të seancës konstituive të Kuvendit.

Pas formimit të Komisionit të përkohshëm për verifikimin e mandateve dhe kuorumit, seanca plenare shkoi në pauzë 15-minutëshe, në mënyrë që ky komision të mund të përpilojë raportin e tij, i cilit më pas duhet të miratohet.
Në sallë janë të pranishëm 119 deputetë, të cilët votuan për krijimin e këtij komisioni të përkohshëm.

11:00 Tashmë gjithçka është gati për fillimin e seancës konstitutive. Në sallën e Kuvendit kanë arritur edhe deputetët e Lëvizjes Vetëvendosje, në krye me kryetarin e saj, Albin Kurtin, të cilët paraprakisht janë nënshkruar.