Ish-ushtari i UÇK-së, Remzi Shala, i njohur me nofkën “Molla e Kuqe”, po vazhdon të jetë në arrati që nga koha kur atij i erdhi ftesa për intervistim nga Gjykata Speciale.

Avokati i tij, Natal Bullakaj, tha gjatë ditës së djeshme se as ai e as familja e Remzi Shalës nuk janë në dijeni për vendndodhjen e ish-ushtarit të UÇK-së.

Të afërm të tij, i kanë thënë lajmit se Shala nuk do t’i përgjigjet ftesës së Speciales.

Ata thonë të kenë kontaktuar me të, dhe se i njëjti u ka thënë se është i vendosur të qëndrojë në arrati.

“Kemi kontaktuar me të. Krejt çka mund të themi është se ai është i vendosur mos t’i përgjigjet Gjykatës Speciale. Ne i kemi kërkuar të paraqitet, por është vendim i tij”, ka thënë një i afërm i Shalës.