Kurti: S’është kollaj kur të jetosh do të thotë veç të banosh, i mbyllur në hapësirë të izoluar në pranverë

Kryeministri në detyrë i Republikës së Kosovës, Albin Kurti ka shprehur shqetësimin e tij lidhur me rritjen e rasteve të dhunës.

Kurti tha se dhuna asnjëherë nuk arsyetohet dhe se është e papranueshme dhe e dënueshme.

“Jemi të shqetësuar se me situatën e vetëizolimit, për shkak të pandemisë së koronavirusit është rritur dhe dhuna në familje. Dhuna asnjëherë nuk ka arsyetim, për ne është e papranueshme dhe e dënueshme”, tha kryeministri në detyrë, Albin Kurti.

Po ashtu ai ka bërë të ditur se Qeveria e Kosovës e ka rritur buxhetin e strhimoreve, për të mbijeutarat e dhunës në vlerën prej 900 mijë eurove.

“Qeveria jonë e ka rritur buxhetin e strehimoreve, për të mbijetuarat e dhunës në vlerën prej 900 mijë eurove. Jemi duke parë format për shtimin e fondeve të programeve kundër dhunës në familje, cfarëdo forme që merr ajo, fizike, psikike, apo seksuale”, tha ai.

Ndër të tjerash Kurti ka theksuar se s’është kollaj kur të jetosh do të thotë veç të banosh, i mbyllur, në hapësirë të kufizuar, në stinën e bukur të pranverës.

“Në këtë kohë qëndrimi në shtëpi na shpëton nga virusi, por dhuna nuk guxon të izolohet i çështje private brenda shtëpive.Ajo duhet të raportohet e institucionet përgjegjëse ta rrisin reagimin në trajtimin e rasteve. Çdo rast i dhunës është rast urgjent, virusi nuk mund ta shtyjë për më vonë ndalimin dhe dënimin e dhunës. Prandaj, rrini në shtëpi, rrini të pastër, rrini në distancë, mbështeteni njëri-tjetrin dhe ndani punët bashkë”, përfundoi Kurti.

RAPORTO