Kurti në Panairin e Librit: “Inteligjenca rrjedh nga libri, IA mundet vetëm t’i lakmojë”

Duke cituar moton e këtij edicioni, “Inteligjenca rrjedh nga libri”, Kurti nënvizoi se libri është mjeti kryesor i një shoqërie të hapur, që sjell liri shpirtërore dhe mendore, shkruan Gazeta Sinjali.

Panairi i këtij viti ka edhe një karakter të veçantë për shkak të përvjetorëve të rëndësishëm që shënohen: 100-vjetori i lindjes së Martin Camajt, 150-vjetori i Faik Konicës, 200-vjetori i Pashko Vasës dhe 400-vjetori i Pjetër Bogdanit. Këta jubile sjellin në vëmendje trashëgiminë e pasur letrare dhe kulturore shqiptare.

Me rreth 2000 tituj të rinj dhe gjithsej 6000 tituj nga rreth 100 botues nga Kosova, Shqipëria, Maqedonia e Veriut dhe diaspora, ky panair pritet të rifreskojë krijimtarinë letrare dhe të ofrojë përvoja të reja për dashamirët e librit.

Kurti ftoi të rinjtë që të shfletojnë dhe shfrytëzojnë pasurinë e librave, duke theksuar se “krijimtaria dhe fuqia e mendimit të artikuluar në faqet e një libri, prek horizonte e thellësi të reja ndjenje e ndjeshmërie, dije e vetëdije të cilat inteligjenca artificiale mundet vetëm t’i lakmojë”. Ky mesazh thekson vlerën e pakrahasueshme të njohurisë dhe humanitetit që transmetohet përmes leximit, duke e dalluar atë nga aftësitë e inteligjencës artificiale.