Kurti kërkon nga AKP-ja që të mos hapin valë të reja të privatizimit në kundërshtim me vendimet në fuqi

Kryetari i Lëvizjes Vetëvendosje, Albin Kurti ka thënë se në planin e tyre qeverisës e kanë paraparë ndryshimin rrënjësor të statusit të Agjencisë Kosovare të Privatizimit (AKP).

Kurti përmes një postimi në facebook thotë se synon rishikimin e gjithë procesit të privatizimit e që nënkupton një trajtim ndryshe të pronës publike ashtu edhe asaj shtetërore.

”Në programin tonë qeverisës kishim paraparë edhe ndryshimin rrënjësor të statusit të Agjencisë Kosovare të Privatizmit (AKP). Synonim rishikimin e gjithë procesit të privatizmit e që nënkuptonte një trajtim ndryshe si të pronës publike ashtu edhe të asaj shtetërore” ka shkruar Kurti.

Kurti gjithashtu ka thënë se Qeveria e tij në dy mbledhje kishte nxjerrë dy vendime të cilat kërkonin nga AKP të pezullojë të gjitha veprimet që lidhen me pronat e palujtshme e pastaj pronat e palujtshme që i kanë nën administrim. E të cilat pastaj edhe ishin shfuqizuar nga Qeveria Kuti.

”Qeveria jonë në dy mbledhje të saj, me 10 mars dhe me 23 mars 2020, kishte nxjerrë dy vendime përmes të cilave kërkonte nga AKP-ja të pezullojë fillimisht të gjitha veprimet në lidhje me pronat e palujtshme nga lista e aseteve për qiradhënie, dhe, pastaj, të pezullojë në afat të pacaktuar të gjitha veprimet në lidhje me pronat e palujtshme që i ka nën administrim. Këto vendime ishin shfuqizuar nga qeveria e cila u instalua pas nesh, por megjithatë kishte vazhduar kërkesa ndaj AKP-së që të mos shpallë asnjë valë të re të privatizmit. Ndërkohë, Kuvendi i Kosovës kishte krijuar një komision hetimor parlamentar për të hetuar keqpërdorimet eventuale në procesin e privatizmit” ka thënë Kurti.

”Tani jam informuar që bordi i AKP-së krejtësisht paligjshëm po synon keqpërdorimin e vakuumit institucional duke tentuar të fillojë valë të reja të likuidimit në kundërshtim me vendimet e lartpërmendura. Thirrjet e bordit në gjoja pavarësinë e institucionit dhe në nevojën që paska vendi për privatizim më të shpejtë në mënyrë që të gjenerohen të hyra shtesë për buxhetin e shtetit, janë konfirmim i mëtejmë i brengës sonë për keqpërdorime në këtë institucion” ka thënë ai.

”E shoh shumë të rëndësishme që publikisht t’i drejtohem bordit të AKP-së me kërkesë që të mos sfidojë mekanizmat institucional dhe të mos provojë të hapë valë të reja të privatizimit apo likuidimit në kundërshtim me vendimet që janë në fuqi. Ju bëj me dije se një nga shtyllat kryesore të programit të qeverisë sonë vazhdon të mbetet lufta ndaj korrupsionit dhe krimit të organizuar. Rrjedhimisht, brenda kësaj kornize do të trajtohet edhe sfidimi eventual i bordit të AKP-së në raport me qeverinë dhe kuvendin e dalë nga zgjedhjet e 14 shkurtit 2021” ka përfunduar Kurti.