Ish-kryetari i Komunës së Suharekës tani deputet në radhët e AAK’së, Blerim Kuçi, ka thënë se taksa me Serbinë ka arritur efektet në aspektin politik dhe ekonomik.

Ish-kryetari i Komunës së Suharekës, Blerim Kuçi nuk ka dashur të komentojë nëse Qeveria e Kosovës duhet të pezullojë përkohësisht taksën siç kanë kërkuar amerikanët.

“Si deputet, taksa i ka arritur efektet. Ka qenë njëri prej potezave, jo vetëm në aspektin ekonomik, por i ka dhënë dinjitet Kosovës. Duhet të shfrytëzohet maksimalisht në raport me Serbinë”, ka thënë Kuçi.

Presidenti i Kosovës, Hashim Thaçi, ka kërkuar sot të dëgjohet këshilla e amerikanëve. Ka thënë se SHBA nuk e ka të pakushtëzuar përkrahjen për Kosovën. Madje, ka thënë se për teke të ndonjë lideri s’bën të rrezikohet partnertiti i Kosovës me SHBA’në.

Sidoqoftë, Blerim Kuçi ka refuzuar të komentojë nëse Qeveria duhet apo jo të dëgjojë këshillën e amerikanëve dhe të Presidentit.

“Më mirë është Zyra e Kryeministrit të japë përgjigjen. Taksa është e Qeverisë. Ne përkrahim çdo vendim të Qeverisë dhe nuk është çështje partiake”, ka deklaruar Kuçi.