KEDS: Situata me energjinë është stabile, qytetarët ta përdorin peletin dhe drunjtë për ngrohje

Zëdhënësi i Kompanisë Kosovare për Distribuim me Energji Elektrike, KEDS, Viktor Buzhala ka theksuar se më shumë që një javë qytetarët po furnizohen pa ndërprerë me rrymë.

“Megjithatë situata është fragjile. Jemi në gjendje emergjente të shpallur nga Qeveria e Kosovës. Ka shumë faktorë që tash për tash janë në favorin tonë, përfshirë kohën, që ka rënë konsumi dhe çmimi i energjisë në berzat ndërkombëtare.

Kjo po na e mundëson që të kemi furnizim stabil me energji”, është shprehur Buzhala në emisionin Portofol në Klan Kosova FM.

Buzhala ka thënë se aktualisht gjysma e rrymës që konsumohet është nga importi.

Ai u ka bërë thirrje qytetarëve që të përdorin drurin dhe peletin si mjet ngrohjeje.

“Çmimi është 200 euro për megavat. Qytetarëve s’u themi ta përdorin qeben, por që të përdorin më shumë dru dhe pelet për ngrohje”.

“Nuk mund të flasim për banesa kolektive, por në vendet e tjera ku ka mundësi sepse do të na e lehtësonte barrën”.