06.09.2019, 10:07

Ish-deputeti i LVV-së: Asnjë koncesion në dëm të Kosovës s’guxon të ndodhë

Zyrtarë të lartë të SHBA-së kanë paralajmëruar palën kosovare dhe atë serbe se duhet të sakrifikojnë për ta arritur marrëveshjen finale. Një deklarim i tillë vlerësohet të jetë riparalajmërim për një kompromis të dhimbshëm Kosovë – Serbi, të cilin kohë më parë e kishin përmendur edhe presidentët e të dyja vendeve.

Ish-deputeti i Lëvizjes Vetëvendosje Rexhep Selimi ka thënë se nuk guxon të ndodhë asnjë kompromis i dhimbshëm mes Kosovës e Serbisë.

“Kosova është shtet i pavarur me Kushtetutën, me kufijtë dhe me sovranitetin e saj. Asnjë koncesion nuk guxon të ndodhë në dëm të sovranitetit të territorit dhe të interesit të qytetarëve të Kosovës”, është shprehur ai gjatë një bisede për “Zërin”.

LEXO EDHE:  Kosova mbetet prapa në trajnimet e stafit mjekësor për metodat e reja të punës

SHBA-ja, sipas Selimit, ka qenë sponsorizues i pavarësisë së Kosovës dhe se si e tillë do të vazhdojë ta mbështesë edhe më tej Kosovën.

“Ne nuk jemi për të pasur luftëra dhe marrëdhënie të këqija mes shteteve të rajonit, por nuk e negociojmë pavarësinë, sovranitetin dhe integritetin territorial me Serbinë edhe me kushtin e normalizimit të marrëdhënieve me të. SHBA-ja është sponsorizuesi kryesor i pavarësisë së Kosovës dhe jemi shumë të bindur që ashtu është edhe në anën e sovranitetit të këtij shteti”, ka shtuar ish-deputeti i LVV-së

© SuharekaOnline. Të gjitha të drejtat janë të rezervuara.