Hapet fushata për zgjedhjen e kryetarit të Vetëvendosjes

Pasi kanë përfunduar kandidaturat në nivelet të strukturave të partisë, në Lëvizjën Vetëvendosje është hapur fushata për kryetar të partisë.

Teknikisht, lideri i padiskutueshëm i Lëvizjes Vetëvendosje, Albin Kurti, mund të sfidohet për këtë post. Partia e tij ka hapur fushatën e zgjedhjeve të brendshme për kryetar/e, ndërsa LV-ja njofton se afati për kandidim është mbyllur më 23 gusht.

Në zgjedhjet e fundit të brendshme që i ka pasur kjo parti, Kurti nuk ka pasur asnjë kundëkandidat dhe u bë kryetar me mbështetje absolute.

Në mbledhjen e Këshillit të Përgjithshëm të LV-së, që u mbajt të dielën, Kurti në një fjalim të gjatë të tij, ndër të tjera, tha se partia e tij është më demokratikja në Kosovë dhe se ajo i ka motivuar të tjerat për ndryshim.

Në Lëvizjen Vetëvendosje janë eleminuar konfliktet për kryetar të partisë, prej kur një pjesë e zyrtarëve të lartë të saj, përfshirë Dardan Molliqajn, Aida Dërgutin, Dardan Sejdiun, etj., u larguan nga partia.

Njoftimi i plotë i LVV-së:

Hapet fushata e zgjedhjeve të brendshme për Kryetar/e të Lëvizjes VETËVENDOSJE! dhe organizatat e ndërvarura GVV dhe RVV

Lëvizja VETËVENDOSJE! po futet në fazën e fundit në kuadër të zgjedhjeve të brendshme. Afati për kandidim për nivelin e dytë dhe tretë organizativ është mbyllur me 23 gusht, ndërkohë sipas kalendarit zgjedhor fushata për nivelin e tretë organizativ është hapur dje, më 1 shtator 2022.

Në nivelin e tretë organizativ zgjedhjet përfshijnë zgjedhjet për:

– Kryetar/e të Lëvizjes VETËVENDOSJE!

– Kryetare të GVV.

– Kryetar/e të RVV.

Fushata e brendshme zgjedhore për nivelin e tretë përfundon me 23 shtator 2022.

Në anën tjetër, ditët në vijim Komisioni Zgjedhor i Përgjithshëm (KZP) do të njoftojë edhe me afatet për fushatën e brendshme zgjedhore për nivelin e dytë organizativ që përfshin qendrat e LV-së.

Lëvizja VETËVENDOSJE! i uron sukses të gjithë kandidatëve!