Fondi i Sigurisë, Mehaj: Vetëm së bashku, mund ta pajisim ushtrinë me pajisje të standardit të NATO-s

Armend Mehaj, ministri i Mbrojtjes ka thënë se Fondi i Sigurisë është hapur pasi që është e domosdoshme që Ushtria e Kosovës të forcohet.

Sipas ministrit Mehaj kjo është e vështirë të bëhet me buxhetin që Qeveria e Kosovës ka ndarë për ushtrinë.

“Atdheu ynë ka nevojë për ne, jam i bindur që do t’i përgjigjemi pozitivisht siç kemi bërë gjithmonë. Donacioni i secilit është i çmueshëm dhe i pa zëvendësueshëm”.

Ministri Mehaj përmes një video mesazhi, ka potencuar se “vetëm së bashku mund të arrijmë qëllimin jetik – Ushtrinë tonë moderne dhe të pajisur sipas standardeve të NATO-s”.

Po ashtu, ai theksoi se Fondi i Sigurisë do të menaxhohet nga Ministria e Financave me transparencë dhe llogaridhënie të plotë.

“Ju falënderojë për të gjitha mesazhet që më keni dërguar, ekziston një mobilizim dhe vullnet i jashtëzakonshëm për të dhënë donacione për ushtrinë tonë. Ushtria jonë buron nga populli. Ajo i shërben vetëm popullit dhe paqes”, ka shkruar Mehaj.