Deficiti tregtar me Italinë arrin mbi 340 milionë euro, eksportet e Kosovës në rënie gjatë vitit 2025
Tregtia e jashtme ndërmjet Kosovës dhe Italisë gjatë vitit 2025 është karakterizuar nga një rritje e ndjeshme e deficitit tregtar dhe rënie e eksporteve kosovare, sipas të dhënave të publikuara nga Agjencia e Statistikave të Kosovës (ASK).
Gjatë vitit 2025, Kosova eksportoi mallra në Itali në vlerë prej 28.9 milionë eurosh, ndërsa importi nga Italia arriti në 369.4 milionë euro. Si rezultat, deficiti tregtar u zgjerua në 340.5 milionë euro, duke shënuar një rritje prej 16 për qind krahasuar me vitin 2024, kur ishte 293.5 milionë euro.
Të dhënat tregojnë se eksporti i Kosovës drejt tregut italian ka rënë me 22.7 për qind në baza vjetore, ndërsa importi është rritur me 11.6 për qind. Për pasojë, mbulueshmëria e importit me eksport ka zbritur në vetëm 7.8 për qind, niveli më i ulët në katër vitet e fundit.
Ky indikator ka shënuar rënie të vazhdueshme nga 16.8 për qind në vitin 2022, në 13.4 për qind në vitin 2023, 11.3 për qind në vitin 2024 dhe 7.8 për qind në vitin 2025.
Italia vazhdon të mbetet një nga partnerët më të rëndësishëm tregtarë të Kosovës, megjithatë shifrat e fundit nënvizojnë nevojën për rritjen e kapaciteteve prodhuese vendore dhe forcimin e pranisë së produkteve kosovare në tregjet ndërkombëtare.
