Defender Europe rikthehet në Kosovë, kryeministri Kurti: Vendi bëhet qendër e ushtrimeve të NATO-s në Ballkan

Këtë vit, “Defender Europe 25” do të angazhojë rreth 25 mijë ushtarakë nga 29 vende aleate dhe partnere. Kosova do të presë veçanërisht ushtrimin e reagimit të menjëhershëm nga data 26 maj deri më 6 qershor, duke mirëpritur rreth 12 mijë ushtarakë nga 19 vende të ndryshme. Ky është një nga tre ushtrimet kryesore që do të zhvillohen në kuadër të këtij edicioni të “Defender Europe”.

Një risi e rëndësishme e këtij viti është vendosja e Komandës së Divizionit të 28-të të Këmbësorisë së ushtrisë amerikane në Aeroportin e Gjakovës. Nga kjo bazë, do të drejtohen të gjitha operacionet dhe ushtrimet në rajonin e Ballkanit, duke e ngritur Kosovën në një qendër kyçe për aktivitetet ushtarake të NATO-s në këtë pjesë të Evropës.

Ky zhvillim shihet si një dëshmi e qartë e thellimit dhe zgjerimit të partneritetit strategjik mes Kosovës dhe Shteteve të Bashkuara të Amerikës në fushën e mbrojtjes dhe sigurisë.

Kryeministri i Kosovës, Albin Kurti, ka theksuar rëndësinë e këtij bashkëpunimi, duke vënë në dukje investimet e vazhdueshme në sektorin e mbrojtjes. “Që nga ndarjet e larta buxhetore për çdo vit, pajisja e ushtarëve me armatim modern e gjithnjë më të shumtë e deri te ngritja e aftësive luftarake, përherë në bashkëpunim me shtetet anëtare të NATO-s, e kanë bërë Kosovën një vend të sigurtë si asnjëherë më parë dhe i tillë që kontribuon dhe eksporton stabilitet,” ka deklaruar Kryeministri Kurti.

Ai gjithashtu ka shprehur përkushtimin e Kosovës për të rritur edhe më tej angazhimin e vendit në ruajtjen e paqes dhe mbrojtjen e sigurisë në rajon dhe më gjerë.

Pjesëmarrja e Kosovës si nikoqire dhe vend qendror për drejtimin e ushtrimeve të “Defender Europe 25” jo vetëm që forcon kapacitetet e sigurisë së vendit, por edhe e pozicionon atë si një partner të besueshëm dhe kontribues aktiv në arkitekturën e sigurisë rajonale dhe evropiane. Ky angazhim i tretë konsekutiv në këtë ushtrim madhor dëshmon përkushtimin e Kosovës për të qenë një faktor stabiliteti dhe sigurie në Ballkan.