Arrestohet një 33-vjeçar me substanca të dyshuara në Prizren

Siç ka raportuar ekskluzivisht Gazeta Sinjali, zyrtarë të Drejtorisë për Hetimin e Trafikimit të Narkotikëve (DHTN) në Prizren, policë nga stacioni lokal dhe njësi të Njësisë së Reagimit të Shpejtë (NJRSH) kanë kryer kontrolle në orët e para të 15 qershorit 2025 në lokalet “Bar-Bon”, “Che-Bar” dhe “Ponte”. Ky operacion është pjesë e operacionit sezonal “Verë 2025” dhe është kryer me autorizim të Kryeprokurorit të Prokurorisë Themelore në Prizren.

Gjatë një kontrolli të detajuar në lokalin “Bar-Bon”, burime të sigurta të Sinjalit bëjnë me dije se tek një person janë gjetur 10 tableta të dyshuara me substancë të panjohur dhe një mjet i mprehtë – brisk.

I dyshuari është identifikuar si F.P., 33 vjeçar.

Pas verifikimeve fillestare dhe në konsultim me hetuesin kujdestar dhe Prokurorin e Shtetit, është marrë vendimi që i njëjti të ndalohet për 48 orë. Ai dyshohet për veprat penale: “Mbajtje në pronësi, kontroll ose posedim të paautorizuar të armëve” dhe “Posedim i paautorizuar i substancave të dyshuara”.