Arrestohet në Prishtinë personi që dërgoi emaile kërcënuese drejt institucioneve

Sipas njoftimit të policisë, pas një hetimi disa mujor nga Drejtoria për Hetimin e Krimeve Kibernetike, në bashkëpunim me Prokurorinë Themelore në Prishtinë, është zbatuar urdhëresa e gjykatës dhe është kryer kontroll në një lokacion në Prishtinë. Gjatë kontrollit, atij i janë gjetur dhe sekuestruar një laptop, një tablet dhe një telefon, të cilat dyshohet se janë përdorur për kryerjen e veprës penale të “kanosjes”.

“Dyshohet se personi i dyshuar, në mënyrë të vazhdueshme, përmes e-maileve ka dërguar mesazhe me përmbajtje kërcënuese në drejtim të institucioneve të Republikës së Kosovës si: Prokurorisë së Shtetit, Policisë së Kosovës, Universitetit të Prishtinës, si dhe në drejtim të zyrtarëve të këtyre institucioneve,” thuhet në njoftimin e policisë.

Me vendim të prokurorit, i dyshuari është ndaluar për 48 orë dhe pritet që të ndërmerren veprime të tjera ligjore.