Ambasadori britanik Hargreaves: Politikanët kosovarë të gjejnë zgjidhje deri nesër
Pas dështimit të radhës për konstituimin e Kuvendit të Kosovës, Ambasadori i Mbretërisë së Bashkuar, Jonathan Hargreaves, ka bërë një thirrje të qartë dhe urgjente për partitë politike që të gjejnë një zgjidhje për bllokadën institucionale para se të përfundojë afati i vendosur nga Gjykata Kushtetuese, i cili skadon të shtunën.
Në një reagim të publikuar pas seancës së sotme të pasuksesshme, ambasadori Hargreaves paralajmëroi se, nëse nuk gjendet një zgjidhje deri nesër, Kosova do të hyjë në një territor të panjohur politik dhe kushtetues.
“I bëj thirrje politikanëve të Kosovës të bashkohen dhe të gjejnë një zgjidhje për t’i dhënë fund bllokimit përpara se afati i Gjykatës Kushtetuese të përfundojë nesër. Përndryshe, Kosova po hyn në një territor të panjohur dhe qytetarët e saj vazhdojnë të humbasin përfaqësimin politik kuptimplotë dhe aftësinë për të marrë vendime të rëndësishme vendase dhe ndërkombëtare që ndikojnë në jetën e qytetarëve,” ka shkruar ai.
Apeli i ambasadorit britanik vjen në një moment kritik për vendin, ku mungesa e institucioneve funksionale po rrezikon përfaqësimin demokratik, vendimmarrjen ndërkombëtare dhe stabilitetin politik të Kosovës.
