Ambasadori amerikan për takimet në Bruksel: E pasqyron seriozitetin e ndërkombëtarëve për të shtyrë përpara procesin e dialogut

Ambasadori i Shteteve të Bashkuara në Kosovë, Jeffrey Hovenier, i ka vlerësuar si pozitive takimet që kryeministri i vendit, Albin Kurti dhe presidenti i Serbisë, Aleksandar Vuçiq patën me liderët e shteteve kryesore të Bashkimit Evropian më 26 tetor në Bruksel.

Hovenier ka thënë se ky takim duhet të shihet si mundësi e jashtëzakonshme që liderët evropianë të ulen dhe të flasin me Kurtin e Vuçiq, për të parë ku qëndrojnë gjërat.

“Mendoj se duhet ta shohim atë takim si mundësi të jashtëzakonshme që kancelari i Gjermanisë, presidenti i Francës, kryeministrja e Italisë së bashku me Përfaqësuesin e Lartë Borrell, me presidentin e Këshillit të Evropës, Charles Mishel dhe të tjerët të ulen dhe të flasin ndaras me secilin prej tyre për të parë ku qëndrojnë gjërat dhe për të kërkuar që të frymëzojnë përparim në këtë proces”, tha Ambasadori Hovenier.

Sipas tij kjo pasqyron seriozitetin e bashkësisë ndërkombëtare dhe veçanërisht të udhëheqjes evropiane për të vënë këtë proces në fazë tjetër.

“Nëse e lexoni deklaratën e tyre të përbashkët, sepse ata dhanë deklaratë të përbashkët më 27 tetor, aty janë disa gjëra të rëndësishme. Aty janë shprehur disa pritje të rëndësishme; pritjet që palët të përmbushin zotimet e tyre për zbatimin e plotë të Marrëveshjes për rrugën drejt normalizimit. Ata e vënë në pah se kjo duhet të bëhet pa parakushte, pa vonesa dhe vënë re se Kosova veçanërisht duhet të ecë përpara me zotimin e saj për zbatimin e plotë të Asociacionit të komunave me shumicë serbe dhe siç thonë në deklaratën e tyre, ata njëkohësisht presin që Serbia të përmbushë zotimin për “njohjen de facto””, ka thënë tutje ambasadori amerikan.